Abama ŭsio mienš papularny

Upieršyniu bolš za pałovu amierykancaŭ nie ŭchvalaje dziejnaść prezidenta ZŠA Baraka Abamy, pakazała sacapytańnie. Ciapier jaho padtrymlivajuć tolki 45% amierykancaŭ, a 52% — nie. Takija nizkija pakazčyki byli tolki ŭ amierykanskaha prezidenta Ronalda Rejhana, kali kraina pieražyvała samy vialiki spad z časoŭ Vialikaj depresii.

Rejtynh prezidenta ZŠA Baraka Abamy dasiahnuŭ rekordna nizkaj adznaki z pačatku jaho terminu na hetaj pasadzie. Niesuciašalnyja dadzienyja byli pryviedzienyja ŭ sumiesnym sacyjałahičnym daśledavańni Ipsos i Reuters.

Na kaniec žniŭnia dziejnaść Abamy ŭchvalaje 45% amierykancaŭ, a 52% praca prezidenta krainy nie zadavalniaje.

Jašče ŭ lipieni prychilniki i praciŭniki Abamy ŭ tym ža apytańni padzialilisia roŭna na dźvie hrupy — pa 48% padtrymlivali i vystupali suprać dziejnaści kiraŭnika krainy. U pačatku 2009 tolki 26% niehatyŭna stavilisia da pracy prezidenta, padtrymka Abamy składała rekordnyja 69%.

U 62% amierykancaŭ jość ćviordaje adčuvańnie, što ciapier ZŠA idzie pa niejkim niapravilnym šlachu. Tolki 31% upeŭnieny, što vybrany pravilny napramak raźvićcia. Zrešty, upieršyniu 60% zajavili, što napramak kraina ŭziała niapravilny, jašče ŭ kancy minułaha hoda.

Na dumku składalnikaŭ apytańnia, stanovišča Abamy vielmi nahadvaje situacyju z prezidentam Ronaldam Rejhanam, jaki kiravaŭ krainaj z 1981 pa 1989: u hety čas adbyŭsia najmacniejšy ekanamičny spad z časoŭ Vialikaj depresii.

Za košt rostu biespracoŭja, spadu ekanamičnaha raźvićcia Rejhan ledź nie straciŭ mahčymaść pajści na pieravybary. Adnak da zakančeńnia jaho pieršaha terminu ŭzrovień biespracoŭja skaraciŭsia, dabrabyt vybarščykaŭ padvysiŭsia, i Rejhan zdoleŭ nabrać 59% hałasoŭ u svaju padtrymku.

Ciapier amierykancaŭ chvaluje ŭ pieršuju čarhu biespracoŭje — hetym pytańniem zakłapočanyja 72% udzielnikaŭ apytańnia. Druhoje pa važnaści pytańnie — dziaržvydatki (67%). Ciapier ŭzrovień biespracoŭja składaje 7,5%, da 2012 prahnazujecca ŭzrovień u 7,1% — pa amierykanskich mierkach heta ŭsio adno vielmi vysoki pakazčyk.

Nizkija rejtynhi Abamy ŭžo na ŭsiu moc vykarystajuć apanienty prezidenta z Respublikanskaj partyi. Kanhresmen ad štata Ahajo Džon Bonier zajaviŭ, što hrupie ekanamičnych daradcaŭ prezidenta Abamy varta ŭ poŭnym składzie syści ŭ adstaŭku. Jon raskrytykavaŭ Bieły dom za nadzvyčaj vysokija dziaržaŭnyja vydatki. U adkaz vice-prezident Džo Bajden abvinavaciŭ Boniera ŭ sprobie viarnucca da toj ekanamičnaj madeli, jakaja pryviała da suśvietnaha ekanamičnaha kryzisu. Choć respublikancy i zhadvajuć rejtynhi prezidenta, 78% amierykancaŭ ŭpeŭnieny, što Vašynhton nie moža efiektyŭna pracavać mienavita praz sutyknieńni pamiž partyjami i halinami ŭłady, jakija nie dazvalajuć dasiahnuć jakich-niebudź vynikaŭ. Tolki 20% nie zhodnyja z takoj traktoŭkaj.

Ekanamičny spad, jaki pačaŭsia ŭ 2007, faktyčna dastaŭsia Abamu ŭ spadčynu, a ŭvosień 2008 pačaŭsia ekanamičny kryzis. «Ekanomika sapraŭdy paŭpłyvała na Abamu i jaho administracyju», — prakamientavaŭ daśledavańnie sacyjołah Ipsos Klif Janh.

«Na niejki čas vybarščyki dali jamu mahčymaść skarystacca ahulnaj źbiantežanaściu. Jon atrymaŭ u spadčynu vielmi ryzykoŭnuju ekanamičnuju situacyju, i jany byli hatovyja dać jamu čas, — patłumačyŭ Janh. — Ciapier ciarpieńnie ŭ asnoŭnym skončyłasia».

Prafiesar palityčnych navuk univiersiteta Ajovy Majkł Ljuis-Biek upeŭnieny, što ŭ Abamy jašče jość čas palepšyć ekanamičnyja pakazčyki. «Dla vybarščykaŭ usie hetyja rečy pačynajuć hrać rolu za hod da vybaraŭ», — zajaviŭ ekśpiert Reuters. «Ja vielmi sumniajusia, što bolšaść vybarščykaŭ budzie hałasavać za ci suprać Abamy na asnovie vieličyni deficytu fiederalnaha biudžetu», — upeŭnieny prafiesar palitałohii i suviaziaŭ z hramadskaściu Prynstanskaha ŭniviersiteta Łary Bartełs. Jon adznačyŭ, što na praciahu pieršaha terminu prezidenta Biła Klintana deficyt źniziŭsia na 90%, ale bolšaść ludziej navat nie viedali pra heta. Dyrektar kampanii Daily Kos Krys Baŭers upeŭnieny, što ŭ vypadku ź biespracoŭjem ludzi buduć źviartać uvahu nie na faktyčnaje źnižeńnie, a na tendencyju da skaračeńnia. «Kali heta zdarycca, pačućcio palapšeńnia daść vializny impuls jaho pieradvybarnym pierśpiektyvam», — upeŭnieny ekśpiert.

• 0
• 0
• 0
• 0
• 0
• 0
• 0
• 0