Pamier finansavaj dapamohi ZŠA dla zamieny vysokaabahačanaha ŭranu pakul vyznačajecca

Pamier finansavaj dapamohi Biełarusi z boku Złučanych Štataŭ Amieryki dla zamieny vysokaabahačanaha ŭranu na abiednieny pakul vyznačajecca, zajaviŭ žurnalistam 13 śniežnia ŭ Minsku časovy pavierany ŭ spravach ZŠA Majkł Skenłan.

«My havorym ab pieramiaščeńni vysokaabahačanaha ŭranu ź Biełarusi ŭ Rasiju i zamienie jaho abiednienym, — skazaŭ dypłamat. — ZŠA ŭziali na siabie abaviazacielstva akazvać finansavuju padtrymku hetamu pracesu pa miery taho, jak jon budzie prachodzić, a taksama akazvać lubuju techničnuju dapamohu, jakaja moža spatrebicca, kab heta adbyłosia chutčej».

Skenłan padkreśliŭ, što ZŠA vysoka aceńvajuć rašeńnie biełaruskaha ŭrada admovicca ad vysokaabahačanaha ŭranu. «My padtrymlivajem praces jaho zamieny na abiednieny ŭran, jaki bolš biaśpiečny, tanny ŭ vykarystańni i nie ŭjaŭlaje pahrozy, kali trapić u ruki terarystaŭ», — zajaviŭ časovy pavierany.

Jak paviedamlałasia raniej, dziaržsakratar ZŠA Chiłary Klintan i ministr zamiežnych spraŭ Biełarusi Siarhiej Martynaŭ u sumiesnaj zajavie, pryniataj 1 śniežnia ŭ Astanie,

dzie prachodziŭ samit ABSIE, paćvierdzili prychilnaść svaich krain jadziernaj biaśpiecy i jadziernamu nieraspaŭsiudžańniu. «Złučanyja Štaty i Biełaruś paćvierdzili svajo ŭjaŭleńnie pra śviet bieź jadziernaj zbroi i ŭziali abaviazak pracavać razam dla praduchileńnia jadziernaha raspaŭsiudžańnia, — havaryłasia ŭ paviedamleńni pres-słužby biełaruskaha prezidenta. — Dziaržsakratar ZŠA pryznała histaryčnaje rašeńnie Biełarusi ab admovie ad svajoj jadziernaj zbroi, pryniataje ŭ 1994 hodzie, u jakaści značnaha ŭniosku ŭ spravu jadziernaha razzbrajeńnia i znoŭ paćvierdziła harantyi biaśpieki Biełarusi, zafiksavanyja ŭ Budapiešckim miemarandumie ad 5 śniežnia 1994 hoda».

Martynaŭ, u svaju čarhu, abjaviŭ, što Biełaruś pryniała rašeńnie ab likvidacyi ŭsich svaich zapasaŭ vysokaabahačanaha ŭranu i maje namier ažyćciavić heta da nastupnaha samitu pa jadziernaj biaśpiecy ŭ 2012 hodzie. «Pryniaŭšy hetaje rašeńnie, Biełaruś dałučajecca da Złučanych Štataŭ u mižnarodnych namahańniach pa pieravodzie jadziernych ustanovak na vykarystańnie nizkaabahačanaha ŭranavaha paliva, što ŭ XXI stahodździ stanovicca suśvietnym standartam, — zaznačałasia ŭ paviedamleńni. — Abodva baki abaviazalisia praciahvać sumiesnuju pracu ŭ śfiery arhanizacyi jadziernaj biaśpieki, uklučajučy pavyšeńnie ŭzroŭniu biaśpieki ŭ Abjadnanym instytucie enierhietyčnych i jadziernych daśledavańniaŭ u Biełarusi».

Martynaŭ i Klintan taksama abaviazalisia ŭmacoŭvać hłabalnaje supracoŭnictva ŭ śfiery mirnaha vykarystańnia jadziernaj enierhii ŭ adpaviednaści ź mižnarodnymi standartami i dadatkovymi dvuchbakovymi damoŭlenaściami, jakija mohuć być zaklučany pamiž Biełaruśsiu i ZŠA.

12–15 śniežnia ŭ Biełarusi znachodziacca pradstaŭniki viadučych analityčnych centraŭ ZŠA. Jak paviedamlaje pres-słužba biełaruskaha MZS, u skład delehacyi ŭvachodziać kiraŭniki prahram, prafiesary i viadučyja supracoŭniki Centra stratehičnych i mižnarodnych daśledavańniaŭ, daśledčaj słužby kanhresa ZŠA, fondu Karnehi za mižnarodny mir, fondu «Spadčyna», fondu «Inicyjatyva pa skaračeńni jadziernaj pahrozy», Instytuta novych demakratyj, Redfardskaha ŭniviersiteta.

U prahramie znachodžańnia amierykanskich analitykaŭ — sustrečy ŭ Nacyjanalnym schodzie, z kiraŭnictvam źniešniepalityčnaha i abaronnaha viedamstvaŭ, biełaruskimi palitołahami i žurnalistami. Amierykanskija pradstaŭniki naviedajuć Park vysokich technałohij, daśledčy instytut «Sosny», mižnarodny navučalny centr MUS pa pytańniach mihracyi i supraćdziejańni handlu ludźmi, Nacyjanalnuju biblijateku.

• 0
• 0
• 0
• 0
• 0
• 0
• 0
• 0