Za čas kiravańnia Pucina...

Nahadajem, što ŭ luboj krainie aktyŭnymi, kreatyŭnymi ličycca 4% nasielnictva. Jak skazaŭ Paster, prybiarycie 100 čałaviek z historyi Francyi — i Francyi nie budzie.

Dla paraŭnańnia: Narviehija i Kanada — dźvie syravinnyja krainy ź nie najlepšym klimatam — majuć pastajanny prytok emihrantaŭ.

Akramia, ułasna, emihrantaŭ jość jašče pucinskija čynoŭniki i siabry. Rasija abvinavačvaje ZŠA ŭ parušeńni pravoŭ čałavieka, ale pucinskija siabry kuplajuć sabie kvatery na Manchetenie. A hramadzianin Finlandyi Hienadź Cimčanka žyvie ŭ Ženievie. Rasija ŭjaŭlaje saboj dziŭnaje vidovišča: puškovy i jakiemienki rvuć hłotki ab tym, što praklaty Zachad zmaŭlajecca suprać vialikaha Pucina. Ale pry hetym haspadary puškovych i jakiemienkaŭ pasyłajuć dziaciej vučycca ŭ Anhliju, viły kuplajuć u Nicy, a hrošy trymajuć u Šviejcaryi. Jany nie kuplajuć nieruchomaść u vydatnaj Paŭnočnaj Karei i nie pasyłajuć dziaciej vučycca ŭ nie mienš vydatnuju Siryju.

Za čas kiravańnia Pucina ŭsie siabry kaapieratyva «Voziera» zrabilisia miljarderami. Ja nie mahu nazvać nivodnaha čałavieka, jaki za hetyja 12 hadoŭ ź nikoha staŭ miljarderam i jaki nie byŭ by pry hetym znajomym Pucina. Heta značyć, jašče raz: usie dobryja znajomyja Pucina stali miljarderami. Nichto ź nieznajomych Pucinu ludziej miljarderam nie staŭ.

Ministry Pucina zbolšaha taksama miljardery. Suprać byłoha ministra suviazi Leanida Rejmana ŭ Hiermanii viadziecca rasśledavańnie. Kali suviaź kuryravaŭ Rejman, u Rasii kvitnieli adny firmy. Kali jaje pačaŭ kuryravać Ihar Šuvałaŭ, pačała kvitnieć firma N-vision. Afšornaja firma taho ž Ihara Šuvałava dała Ališeru Usmanavu 50 młn dalaraŭ na kuplu akcyj Corus Group, a mienš čym praz hod Usmanaŭ viarnuŭ hetaj firmie 100 młn dalaraŭ.

Spadarynia Holikava, ministr achovy zdaroŭja, patranuje firmu «Farmstandart», jakaja, u liku inšaha, vyrablaje preparaty suprać kašlu «Tierpinkod» i «Kadełak». Prodažy hetych preparataŭ rastuć pa ekspaniencie. Nie tamu, što rasijcy pačali bolš kašlać — prosta «Terpinkod» i «Kadełak» — tannaja syravina dla vytvorčaści samaha strašnaha ŭ śviecie narkotyka — dezamarfina. Krainu pažyraje dezamarfinavaja epidemija, a kampanija «Farmstandart» atrymlivaje zvyšprybytki z prodažaŭ syraviny dla narkotyka. Prybytki «Farmstandarta» ad «Terpinkoda» i «Kadełaka» pieravyšajuć prybytki luboha, samaha vialikaha optavaha handlara hierainam.

Dziaržprajekt pa madernizacyi pačaŭsia z taho, što kuratar «SKOŁKOVO» sp. Vieksielbierh kupiŭ u vienhierskaha ŭrada budynak za 21 młn dalaraŭ i tut ža pradaŭ jaho dziaržavie za 116 młn dalaraŭ.

Za čas kiravańnia Pucina kraina atrymała 1,5 trłn. naftadalaraŭ i nie pabudavała nivodnaj darohi, jakaja adpaviadaje standartam aŭtabana.

Takoha fantastyčnaha nachabstva — marnavać naftadalary vyklučna na pałacy, a nie na darohi — užo nie demanstruje navat ni adzin z arabskich režymaŭ.

Dla paraŭnańnia: Kitaj usie hetyja hady budavaŭ pa 5–6 tys. km. aŭtabanaŭ štohod i ciapier vałodaje druhoj pa vieličyni darožnaj sietkaj u śviecie paśla ZŠA.

Za čas kiravańnia Pucina ekanomika krainy kančatkova pieratvaryłasia ŭ ekanomiku RAZ — raśpiłoŭvańnie-adkat-zanos. U krainie paŭstaŭ ceły słoŭnik sinonimaŭ, jakija abaznačajuć chabar. Raniej u «Rasnafcie» heta nazyvałasia «chatniaje zadańnie», ciapier — «scenarnyja ŭmovy». «Vy nie adpaviadajecie scenarnym umovam».

Za čas kiravańnia Pucina pravaachoŭnyja orhany krainy raskłalisia całkam.

Za čas kiravańnia Pucina biespakaranyja zabojstvy ludziej na darohach zrabilisia normaj. Čynoŭniki i aliharchi zabivajuć prosty narod i vychodziać suchimi z vady. Kali svajaki achviar sprabujuć zmahacca, jak svajaki zabitaj synam ministra abarony Śviatłany Bierydze, na ich zavodziacca kryminalnyja spravy. Apošniaje hučnaje zabojstva, učynienaje kartežam smalenskaha hubiernatara-piensijaniera Juryja Družynina, što niośsia na chutkaści 200 km u hadzinu, adbyłosia napiaredadni vybaraŭ.

Za čas kiravańnia Pucina Rasija zrabiłasia dańnikam Čačni. Čačency ŭ Maskvie z pomsty rasstralali pałkoŭnika Budanava i z zadavalnieńniem stralajuć pa rejsavych aŭtobusach. Pa «Prezident-hateli» chodziać ludzi ŭ tapačkach i sa «ściečkinym». Pa Maskvie chodziać čutki pra čačenskich bajevikoŭ, hatovych razahnać mitynhoŭcaŭ, i choć čutki hetyja — chłuśnia, ale ich źjaŭleńnie nadzvyčaj simptamatyčnaje.

Adsutnaść zakona robicca asablivaj katastrofaj dla šmatnacyjanalnaj krainy ź dźviuch pryčynaŭ.

Pucinskaja biurakratyja vyjaviłasia nadziva nieefiektyŭnaj ŭ vykanańni navat tych zadač, jakija jana sama sabie pastaviła. Dola Hazprama na jeŭrapiejskim rynku hazu rezka skaraciłasia. Zatoje ŭzros sabiekošt. Rasija tak i nie pačała raspracoŭku «Štokmana». Rasija tak i nie pabudavała «Paŭdniovy patok». «Paŭnočny patok», pahadnieńnie pra jaki było padpisana ŭ 2005-m hodzie, abydziecca Rasii jak minimum u 16 młrd dalaraŭ. Dla paraŭnańnia: u 2006-m hodzie Kitaj padpisaŭ z Turkmienistanam pahadnieńnie ab budaŭnictvie hazapravoda, i toj užo pabudavany. Budaŭnictva abyšłosia ŭ 2 młrd dalaraŭ. Bieź pierabolšańnia možna skazać, što adzinym paśpiachovym prajektam, sapraŭdy realizavanym, źjaŭlajecca adnaŭleńnie horada Hrozny. U hetaha paśpiachovaha prajekta, adnak, šmat inšych pabočnych efiektaŭ.

4 śniežnia zdavałasia, što ŭsio heta budzie praciahvacca jašče 12 hadoŭ. Da poŭnaha źniščeńnia Rasii. 5 śniežnia pieršyja pratestoŭcy, vyjšaŭšy na vulicu, skazali: «Chopić».

• 0
• 0
• 0
• 0
• 0
• 0
• 0
• 0