Čaćviarym pradstaŭnikam Ministerstva adukacyi Polščy admovili ŭ biełaruskaj vizie.
Jany źbiralisia ŭziać udzieł u Druhim forumie polskamoŭnaj adukacyi, jaki prajšoŭ u Baranavičach. Pryčyny admovy im nie patłumačyli.
Nie paličyli patrebnym uźniać udzieł u mierapryjemstvie i pradstaŭniki biełaruskaha Ministerstva adukacyi. Jany kamandziravali na forum dvuch kiraŭnikoŭ adździeła adukacyi Baranavickaha harvykankama, jakija ŭsich słuchali, ale ŭ adkaz maŭčali.
Zrešty, navat kali b i chacieli, jany naŭrad ci zmahli b rastłumačyć, čamu Biełaruś nie vydaje vizy i admaŭlaje ŭ pravie na pracu nastaŭnikam — nośbitam polskaj movy.
«Sioleta naš departamient i ja asabista zajmalisia viadzieńniem pieramovaŭ pa zaklučeńni pahadnieńniaŭ ab adukacyi ź dźviuma krainami. Z Kazachstanam atrymałasia damovicca: užo jość tekst pahadnieńnia, ciapier abmiarkoŭvajucca ŭmovy jaho padpisańnia. Druhaja kraina — Biełaruś. My byli ŭ Minsku, i nam atrymałasia damovicca pa 18 punktach pahadnieńnia z dvaccaci. Sprečnym, naprykład, zastajecca punkt ab mahčymaści prysyłać z Polščy nastaŭnikaŭ polskaj movy ŭ hramadskija škoły ŭ Biełarusi. Ciapier my čakajem adkazu na našyja prapanovy pa hetym pytańni ad biełaruskaha boku», — cytuje Jacka Multanoŭskaha, namieśnika dyrektara departamienta publičnaj i kulturnaj dypłamatyi Ministerstva zamiežnych spravaŭ Polščy «Briestskaja hazieta».
«Nam važna, kab u ludziej, jakija vyvučajuć polskuju movu ŭ Biełarusi, była mahčymaść pačuć sapraŭdnuju polskuju movu, biez dyjalektaŭ, miascovaha nalotu.Hetaha nastaŭniki ź Biełarusi dać nie mohuć pry ŭsim svaim žadańni», — rastłumačyŭ, u svaju čarhu, nadzvyčajny i paŭnamocny pasrł Respubliki Polšča ŭ Respublicy Biełaruś Lešak Šarepka.
Načalnik adździeła adukacyi Baranavickaha harvykankama naŭrad ci mahła adkazać, čamu ŭ Biełaruś nie puskajuć nastaŭnikaŭ polskaj movy.
Taksama nie ŭ jaje kampietencyi tłumačyć situacyju z padručnikami: u Biełarusi da hetaha času nie vydadzienyja padručniki na polskaj movie pa šerahu dakładnych i pryrodaznaŭčych dyscyplin.
Nahadajem, što artykuł 50 Kanstytucyi Biełarusi śćviardžaje, što «dziaržava harantuje ŭ adpaviednaści z zakonam svabodu vybaru movy vychavańnia i navučańnia».Jak pakazaŭ Forum, na spravie dziaržava harantuje, što ŭ tych, chto abiare dla navučańnia svaich dziaciej polskuju movu, buduć prablemy.
Kamientary