Праваабаронца Анатоль Паплаўны правёў у Гомелі акцыю салідарнасці з Алесем Бяляцкім — арыштаваным роўна два гады тамувіцэ-прэзідэнтам Міжнароднай федэрацыі правоў чалавека, кіраўніком закрытага беларускімі ўладамі праваабарончага цэнтра «Вясна».
Гомельскі праваабаронца распаўсюдзіў у людных месцах абласнога цэнтра (на рынках, прыпынках грамадскага транспарту) некалькі соцень паштовак з партрэтам Бяляцкага і інфармацыяй пра тое, як і за што ён апынуўся ў месцах пазбаўлення волі. Акцыя салідарнасці пачалася на прыпынку грамадскага транспарту каля Гомельскага дзяржуніверсітэта імя Ф.Скарыны, дзе ў свой час вучыўся і пачаў актыўную грамадскую дзейнасць Бяляцкі.
«Алесь Бяляцкі ў зняволенні, але ён — з Богам і праўдай, з намі, яго сябрамі і калегамі. Думаю, што ўсё найлепшае ў яго наперадзе, жадаю яму сіл і мужнасці», — заявіў Паплаўны.
Разам з калегамі ён падаваў у гарвыканкам заяўку на правядзенне ў Гомелі 4 жніўня вулічнага шэсця ў знак салідарнасці са зняволеным праваабаронцам, але ўлады не санкцыянавалі мерапрыемства. Сваю адмову яны матывавалі тым, што па маршруце шэсця размешчаны падземны пешаходны пераход і адміністрацыйныя будынкі, а гэта супярэчыць закону аб масавых мерапрыемствах.
Каментары