Дакументы пра «бацьку Януковіча паліцая» — фэйк
Звесткі пра «паліцайскае» мінулае Фёдара Януковіча з’явілася ў віртуальнай прасторы ў часе апошняга палітычнага крызісу ва Украіне. Ці быў бацька прэзідэнта Украіны паліцаем, «Belsat.eu» высвятляў у вёсках, згаданых у нядаўна апублікаваных дакументах.
Паперы ваенных часоў нарабілі шуму ў інтэрнэце яшчэ год таму. У час сёлетніх падзеяў ва Украіне дакументы ўзгадалі яшчэ раз. Адзін з іх падае спіс дэзерціраў вайны, якія падлягалі этапаванню ў распараджэнне НКВД. Інфармацыя пра «здрайцу № 5» цалкам супадае з афіцыйнаю біяграфіяй бацькі Віктара Януковіча – народжаны ў вёсцы Янукі Віцебскай вобласці. Другая папера – загад вермахту аб паборы малака з жыхароў вёскі Мацкі. Нібыта кантраляваць працэс абавязалі начальніка паліцыі Радашковіцкага раёна Януковіча.
Мы паехалі слядамі Януковіча, а дакладней, слядамі папераў. Янукі схаваліся між Докшыцамі ды Мядзелам.
170 км ад Менску, дапамога GPS-навігатара – і мы ў гістарычным месцы. Жылая вёска – гэта дзве хаты і дзве сям’і. Пятро і Аквіліна Януковічы – брат і сястра, 73 і 80 гадоў. Яны не родныя прэзідэнта, проста ў Януках раней кожны другі меў такое прозвішча. Могілкі пацвярджаюць гэта – старыя помнікі праз адзін з надпісам «Януковіч» ці «Janukowicz». Найстарэйшы – з датаю нараджэння 1843 год, ёсць і цалкам ужо зацёртыя. «Януковічы разляцеліся па свеце», – гаворыць спадарыня Аквіліна.
«А які ж ён наш?!»
Аквіліна Лявонаўна ўжо прызвычаеная да журналістаў і здымак. «А які ж ён наш?! — войкае яна пасля словаў пра Віктара Януковіча. — Я ж яго ведаю гэтак, як і вы!». Спадарыня Аквіліна распавядае, што дзед прэзідэнта з’ехаў у Данбас, калі «нас на свеце не было», і больш не вяртаўся. Бацькі ягонага ніхто ў вёсцы таксама не бачыў. Падчас вайны яго тут дакладна не было. Дзе стаяла хата Фёдара Януковіча — ніхто не ведае.
Янукі пасля доўгіх пошукаў радзімы дзеда наведаў сам Віктар Януковіч. «Прыехаў, з начальнікамі тут быў. Яны самі яго ўгашчалі. Угасцілі — ён і паехаў. Нам ніхто не даў пагаварыць. Вось калі б да нас прыехаў!..» — уздыхае Аквіліна Лявонаўна. Жыхары толькі зводдаль паглядзелі на ганаровага госця. А пра прэзідэнта ведаюць з тэлебачання.
«Толькі ён і надаецца на прэзідэнта! А яны не любяць яго»
«Чалавек добры, удалы… Толькі ён і надаецца на прэзідэнта! А яны не любяць яго. Ён жа стараецца, каб падняць краіну. Разумны, талковы чалавек… А нам і Лукашэнка не благі, добры. Нам усяго хапае. А яго і ў Менску палова не любіць. А чаго не любяць? Можа, каб пажылі б у вайну, пагаладалі, дык і любілі б усе», — усміхаецца гаспадыня.
Януковічы дагэтуль трымаюць карову, на ланцугу сабака. Старыя не мелі сем’яў цэлае жыццё. Праз якісьці час і ў гэтае хаце ніхто не ўзгадае пра мінуўшчыну.
«Гэта фэйк з пачатку да канца»
Гісторык Аляксандр Гелагаеў спецыялізуецца на гісторыі Беларусі часоў Другой сусветнай вайны. Ён мяркуе, што «дакументы» выглядаюць вельмі ненатуральна. «Вілейскі» дакумент з дзіўнаю памылкаю ў слове «Радашковічы» ўвогуле падобны да няўдалага фоташопа. Няма спасылак на сучасныя архівы, дзе яны мусяць размяшчацца. Да таго ж бацька Януковіча, паводле тых звестак, якія ёсць у інтэрнэце, нарадзіўся ўжо на Данбасе, куды перабраўся яшчэ ягоны дзед. На мой погляд, гэта фэйк на 100%».
Журналіст Кастусь Шыталь таксама мяркуе, што гэтыя дакументы — падробка. Сваю думку ён тлумачыць неадпаведнасцю пэўных тэрмінаў і часу ў гэтых згадках.
«Падчас акупацыі генеральная акруга Беларусь дзялілася на акругі, а не вобласці. «Зямельныя аддзелы» былі ў органах СССР, а не ў акупацыйнай адміністрацыі, — піша Кастусь на сваёй старонцы ў «Facebook’у». – Ну, і самы пераканаўчы аргумент: вёска Янукі стала належаць Віцебскай вобласці толькі ў 1960 годзе. У 1945-м яна належала Полацкай».
Каментары