Амерыканскія навукоўцы пацвердзілі тэорыю «Вялікага выбуху»
Учора, 17 сакавіка, у Гарвард-Смітсанаўскім цэнтры астрафізікі прайшла прэс-канференцыя, падчас якой амерыканскія навукоўцы паведамілі пра грандыёзнае адкрыццё. Дзякуючы дадзеным, атрыманым у абсерваторыі BICEP2 на Паўднёвым полюсе, астрафізікі зафіксавалі так званыя рэліктавыя гравітацыйныя хвалі, спароджаныя Вялікім выбухам 13,8 мільярды гадоў таму.
Пры дапамозе спецыяльнага радыётэлескопа навукоўцы адсочвалі, як змянялася палярызацыя рэліктавага выпраменьвання, якое ўзнікла ў момант з'яўлення Сусвету. Як тлумачаць астрафізікі, гравітацыйныя хвалі аказваюць на палярызацыю непасрэдны уплыў. Карта тэмператур рэліктавага выпраменьвання і карціна палярызацыі даказваюць тэорыю інфляцыі, згодна з якой Сусвет пачаўся з Вялікага выбуху і ў першыя секунды існавання экспанентна пашыраўся.
Гэтае адкрыццё вельмі важнае для сучаснай навукі. Яно дасць магчымасць вызначыць, як адбывалася пашырэнне Сусвету, і вылічыць магутнасць гэтага працэсу. Існаванне рэліктавых гравітацыйных хваляў было прадказана Альбертам Эйнштэйнам яшчэ 100 гадоў таму, аднак да гэтага часу гіпотэза не была пацверджаная эксперыментальна. Калі адкрыццё пацвердзіцца, навукоўцаў чакае Нобелеўская прэмія.
Галыгіна прымусілі апраўдвацца за зварот да сілавікоў у 2020-м17
Каментары