У Мінску 12 жніўня затрыманы ўраджэнец Масквы 27-гадовы Аляксей Антановіч, які абвінавачваецца ў злачынстве экстрэмісцкай скіраванасці, паведамляецца на сайце Следчага камітэта Расіі.
У інфармацыі гаворыцца, што галоўным следчым упраўленнем СК РФ па горадзе Санкт-Пецярбургу раней паведамлялася пра ліквідацыю экстрэмісцкай групоўкі, члены якой учынялі злачынствы на глебе расавай і нацыянальнай нецярпімасці. На лаве падсудных апынуліся Георгій Цімафееў, які стварыў злачынную групу, а таксама 11 маладых людзей ва ўзросце ад 17 да 24 гадоў, якія з 2009 па 2010 год, з мэтай распальвання расавай і нацыянальнай нянавісці і варожасці, учынілі дзясяткі цяжкіх і асабліва цяжкіх злачынстваў, сярод якіх забойствы, падрыў аўтобуснага прыпынку, падпал храма. Злачынцы фіксавалі свае дзеянні на відэа для распаўсюджвання.
Усе члены злачыннай групы былі прыгавораныя да працяглых тэрмінаў пазбаўлення волі. Падчас следства быў устаноўлены і Аляксей Антановіч, якому выставілі абвінавачанне ў распальванні нянавісці і варожасці, учыненай групай асоб (п. «в» ч. 2 арт. 282 КК РФ).
Паводле версіі следства, у снежні 2009 года Антановіч, якія ведаў пра ўчыненыя членамі злачыннай групы злачынствы, размясціў у інтэрнэце відэаролік са зваротам членаў злачыннай групы, які змяшчае экстрэмісцкія выказванні і сцэну забойства каля аднаго з дамоў па праспекце Ветэранаў, тым самым распаўсюдзіўшы яго сярод неабмежаванага кола асоб. Пасля выстаўлення абвінавачання Антановіч хаваўся ад органаў следства, у сувязі з чым ён быў абвешчаны ў міжнародны вышук.
Цяпер вырашаецца пытанне аб экстрадыцыі Антановіча ў Расію.
Цяпер чытаюць
Стаў вядомы сэнс крымінальнай «справы страхаўшчыкоў»11
Каментары