Беларускамоўны брытанец: «Я думаў, што тут вельмі дзікая і мілітарызаваная краіна»
Брытанец Оўэн Браўн не першы год вандруе па свеце. Ён паспеў пажыць у Польшчы, Літве, Нарвегіі і Украіне, а пасля прыехаў у Беларусь, каб вучыць мовы ды адкрыць для сябе новую краіну.
Ён кажа, што шмат хто з яго знаёмых паехаў вучыць рускую ў Расію ці Украіну, а ён вырашыў рабіць гэта ў Беларусі, таму што мала ведаў пра яе.
«Мне заўсёды хацелася вандраваць, знаёміцца з цікавымі людзьмі ды вучыць мовы, але ў маёй сям'і не было магчымасці лятаць кудысьці, таму ў дзяцінстве я толькі ездзіў па Брытаніі на машыне, — кажа хлопец. — Калі збіраўся ў Мінск, то адмыслова нічога не чытаў пра яго, хацеў, каб быў сюрпрыз».
Дызайнер па адукацыі, Оўэн зарабляе выкладаннем англійскай мовы як замежнай.
«Жыць у новай краіне спачатку не вельмі проста, бо не ведаеш мовы, але мне гэта нават падабаецца, таму што ў жыцці павінны быць нейкія цяжкасці, і пераадольваць іх вельмі цікава».
Ужо на другі месяц жыцця ў Мінску Оўэн пачаў вучыць беларускую мову: на кінапраглядзе у ДК «Ля Мора» ён пазнаёміўся з беларускамоўнай дзяўчынай і захацеў таксама размаўляць па-беларуску. Вывучыць новую мову было не складана, таму што Оўэн ужо ведаў польскую і троху рускую.
«Мне падаецца, што калі б беларусы менш баяліся трасянкі, то больш бы размаўлялі на роднай мове. Гэта натуральна — рабіць памылкі, калі вывучаеш мову, у гэтым няма нічога заганнага. Увогуле, сітуацыя з беларускай не вельмі добрая, але я яе разумею. Заўсёды былі людзі, якія не хацелі, каб беларусы размаўлялі па-беларуску, але калі яны не будуць, то хто будзе размаўляць?»
Глядзіце гутарку з Оўэнам у рэпартажы «НН»:
Каментары