Футбольны клуб «Кубань» і галоўны трэнер Леанід Кучук «дасягнулі ўзаемнага пагаднення аб скасаванні працоўнага дагавора», паведаміла 25 мая прэс-служба клуба.
«Леанід Кучук двойчы ўзначальваў галоўную каманду Краснадарскага краю — у 2013 і 2014—2015 гадах, меўшы дачыненне да найвышэйшых дасягненняў у гісторыі клуба — выхадаў у Лігу Еўропы і фінал Кубка Расіі», — зазначаецца ў рэлізе.
У сярэдзіне лістапада мінулага года Кучук змяніў іншага беларускага спецыяліста — Віктара Ганчарэнку, якому была пастаўленая ў віну адсутнасць належнай дысцыпліны ў камандзе.
З 15 матчаў у межах чэмпіянату Расіі пад кіраўніцтвам Кучука «Кубань» выйграла толькі адзін і апусцілася з пятага месца на дзясятае, а пасля паражэння ў фінале Кубка Расіі (ад былога клуба Кучука «Лакаматыва») пазбавілася шансаў згуляць на міжнароднай арэне.
Між тым пад кіраўніцтвам Ганчарэнкі каманда правяла першыя 13 матчаў чэмпіянату Расіі, у якіх атрымала шэсць перамог, шэсць разоў згуляла ўнічыю і адзін раз прайграла (0:6 маскоўскаму ЦСКА, пасля чаго адбылася адстаўка).
Да канца чэмпіянату Расіі «Кубанню» будзе кіраваць асістэнт Кучука Андрэй Сасніцкі. Экс-абаронца зборнай Беларусі быў галоўным трэнерам брэсцкага «Дынама» і малдаўскага «Шэрыфа», а таксама працаваў на розных пасадах у мазырскай «Славіі» і маскоўскім «Лакаматыве». 25 мая краснадарцы згулялі ў Маскве ўнічыю 1:1 з «Лакаматывам», дзе Кучук працаваў да пераходу ў «Кубань».
Цяпер чытаюць
У Кіеве за шпіянаж арыштавалі беларускую журналістку Іну Кардаш. Кажуць, з 2015 года яна працавала на КДБ26
Каментары