У Мінску затрыманы член рады дырэктараў горназдабыўной кампаніі «Інтэргеа», якая ўваходзіць у групу «Анэксім» расійскага мільярдэра Міхаіла Прохарава, Максім Фінскі. Пра гэта паведамляюць расійскія СМІ.
Фінскі быў затрыманы ў Нацыянальным аэрапорце Мінск падчас рэгістрацыі на рэйс, які вылятае ў Франкфурт. Па звестках «Новой газеты», памежнікі засумняваліся ў сапраўднасці пашпарта на імя Уласава, які быў прадастаўлены Фінскім. Дадатковая праверка паказала: пашпарт фальшывы. Высветлілася, што скарыстацца фальшывым пашпартам Фінскі вырашыў пасля ўцёкаў з Масквы, дзе ён знаходзіўся пад хатнім арыштам. Да Мінска Фінскі дабраўся на аўтамабілі службы бяспекі Прохарава.
Паводле інфармацыі Масгарсуда, у дачыненні да Максіма Фінскага заведзена крымінальная справа па ч. 4 арт. 159 КК РФ (Махлярства, здзейсненае арганізаванай групай альбо ў асабліва буйным памеры). Па звестках расійскіх СМІ, нагодай для расследавання стала заява банка ВТБ з нагоды непагашанага крэдыту, выдадзенага канадскай кампаніі White Tiger Gold, кантраляванай Максімам Фінскім, а аператыўнае суправаджэнне справы ажыццяўляе ФСБ Расіі. У сярэдзіне красавіка Фінскага змясцілі ў СІЗА «Лефортава», але там ён правёў каля тыдня і быў пераведзены пад хатні арышт.
Цяпер Максім Фінскі знаходзіцца ў следчым ізалятары КДБ Беларусі, у якім у 2013 годзе каля месяца прасядзеў гендырэктар «Уралкалія» Уладзіслаў Баўмгертнер.
У групе «Анэксім» адмовіліся ад каментароў.
На наступны дзень, 29 мая, начальнік прэс-службы КДБ Дзмітрый Пабяржын паведаміў, што КДБ Беларусі не мае дачынення да затрымання Максіма Фінскага.
«У СІЗА КДБ Максім Фінскі не знаходзіцца, Камітэт не мае дачынення да яго затрымання», — сказаў Дзмітрый Пабяржын.
Цяпер чытаюць
28‑гадовы беларус паехаў у Расію і ажаніўся. Адразу завербаваўся на вайну, паваяваў месяц — і загінуў16
Каментары