Старшыня аргкамітэта для стварэння Беларускай сацыял-дэмакратычнай партыі (Народная Грамада) Мікола Статкевіч бачыць дзве альтэрнатывы што да парламенцкай кампаніі: альбо ігнараванне, альбо акцыі пратэсту.
- Прадстаўнік ЦВК Мікалай Лазавік заявіў, што вашу ініцыятыўную групу зарэгіструюць толькі ў выпадку зняцця з вас судзімасці. Як вы пракаментуеце гэтую заяву?
- Гэта цалкам чакана. Мяне здзіўляе іншае: чаму акцыю Народнай Грамады некаторыя наогул успрынялі як маё «вылучэнне ў дэпутаты»?
Усур'ёз «варыцца» ва ўсім гэтым фарсе — такое мне нават у страшным сне не можа прысніцца. Мы падалі заяву на рэгістрацыю ініцыятыўнай групы для таго, каб паказаць грамадству і заходнім палітыкам, якія жадаюць «дыялогу» з Лукашэнкам, што ў краіне прадаўжаецца пераслед былых палітвязняў.
Судзімасць з нас не здымаюць, і мы нават не можам паўдзельнічаць у выбарчым фарсе, які быў наладжаны ўладамі дзеля заходніх крэдытаў. Пра гэта мы і хочам нагадаць, арганізаваўшы такую акцыю ў сувязі з «выбарамі».
Ёсць 1% імавернасці, што ўлада зарэгіструе маю ініцыятыўную групу. Я адразу адкрыта заяўляю: тады мы правядзем цягам некалькіх тыдняў акцыі ў цэнтры ў Менску — пад прыкрыццём кампаніі для збору подпісаў. Мэта нашай спробы рэгістрацыі — каб людзей не штрафавалі за гэтыя акцыі. Я пра гэта заяўляю гучна і адкрыта, і хай улада прымае мой выклік і выбірае: рэгістраваць мяне ці не.
Калі ініцыятыўную групу не зарэгіструюць, то гэта дасць для Народнай Грамады нагоду выказаць сваё стаўленне да гэтых «выбараў»: калі рэжым нават дзеля заходніх грошай не ідзе на імітацыю «лібералізму», то я і мае калегі заяўляем пра няўдзел у гэтым фарсе. І мы будзем заклікаць да няўдзелу ў «выбарах» нашых партнёраў у апазіцыі і Беларускім нацыянальным кангрэсе.
- Вы кажаце цяпер пра няўдзел або пра байкот «выбараў»?
- Байкатаваць тое, чаго няма, складана. Можна байкатаваць сапраўдныя выбары, дзе рэальна падлічваюць прыход выбаршчыкаў. У фарсе ж можна толькі не ўдзельнічаць.
Тым жа, хто ўважае сябе за частку дэмакратычнай апазіцыі, я хачу нагадаць аб прынцыпах салідарнасці. Калі мы ўсе прызнаем, што «выбараў» няма, давайце пакажам, што можам быць салідарнымі ў непрыманні гэтага фарсу.
Цяпер чытаюць
Беларусь адмовілася часова адкрыць пункт пропуску «Беняконі»29
Каментары