Нацыянальны алімпійскі камітэт Італіі афіцыйна зняў кандыдатуру Рыма на правядзенне Алімпійскіх гульняў 2024 года.
«Сёння я напісаў ліст у Міжнародны алімпійскі камітэт (МАК), у якім мы адклікалі нашу заяўку», — заявіў кіраўнік камітэта Джавані Малага.
Мэр Рыма Вірджынія Раджы, абраная на гэты пост у чэрвені і якая прадстаўляе апазіцыйны «Рух 5 зорак», яшчэ ў ходзе перадвыбарнай кампаніі заяўляла, што не падтрымае ідэю правядзення Алімпіяды ў сталіцы Італіі.
21 верасня яна абвясціла, што сталіца Італіі адмаўляецца прэтэндаваць на правядзенне Гульняў. Неўзабаве гэтае рашэнне было ратыфікаванае на пасяджэнні гарадскога савета, аднак кіраўнік Нацыянальнага алімпійскага камітэта раскрытыкаваў гэтае рашэнне і паабяцаў дабівацца правядзення Алімпіяды.
Вірджынія Раджы раней заяўляла, што Рым мае мільярдныя даўгі і не можа дазволіць сабе раскошу новых інвестыцый, якіх патрабуе Алімпіяда. Сродкі, якія неабходныя для правядзення Гульняў, на яе думку, лепш выдаткаваць на больш важныя мэты — уборку смецця і барацьбу з карупцыяй.
Горад-арганізатар летніх Алімпійскіх і Паралімпійскіх гульняў 2024 года будзе абвешчаны 13 верасня 2017 года ў Ліме. На права правядзення Гульняў цяпер прэтэндуюць Лос-Анджэлес, Парыж і Будапешт.
Цяпер чытаюць
Латушка: У Пяткевіч трэсліся рукі, галава, яна тупала, крычала: «Вы насаджаеце нацыяналізм»25
Каментары