Днямі дырэктарам рэспубліканскага ўнітарнага прадпрыемства «Гатэль Мінск» была прызначаная Назгуль Таламушова. За гэтым прозвішчам хаваецца жонка былога прэзідэнта Кыргызстана Курманбека Бакіева, які некалькі гадоў таму атабарыўся ў Беларусі.
РУП «Гатэль Мінск» з'яўляецца адным з ключавых актываў у структуры Кіраўніцтва справамі прэзідэнта Беларусі.
Tut.by датэлефанаваўся да Назгуль Таламушовай. Але, выслухаўшы пытанні, яна сказала, што не можа размаўляць. Папрасіла ператэлефанаваць пазней. У выніку каментар атрымаць не ўдалося.
Бакіеў з 2010 года з'яўляецца грамадзянінам Беларусі, ён лічыць немагчымай сваю экстрадыцыю ў Бішкек, як патрабуе цяперашняя ўлада Кыргызстана.
Па словах Таламушовай, яны разам з Бакіевым жывуць з 1995 года. «Мой будучы муж спадабаўся мне з першага погляду, — распавядала яна ў 2011 годзе інтэрв'ю газеце «Айат». — Нам з ім выпала разам выпрабаваць і слодыч, і горыч жыцця, мы з ім жывем адзінай сям'ёй».
Жонка Бакіева сказала, што палюбіла Беларусь, але не з першага погляду. «Беларусь нам спадабалася, — казала Назгуль Муратбекаўна. — Людзі тут простыя, добрыя, з шырокай душой. Раз так склаліся абставіны, абвыкаеш. Пакуль народ правільна не зразумее і не даведаецца пра невінаватасць Курманбека Саліевіча, нам лепш заставацца тут. Вядома, на радзіме і зямля — золата, але пакуль у нас няма думак вярнуцца ў Кыргызстан».
З першай жонкай Бакіева Таламушова даўно знаёмая і «паважае як жанчыну і маці».
Цікава, што намеснікам дырэктара «Гатэля Мінск» з'яўляецца былы памочнік Лукашэнкі і вядомы дэпутат Віктар Кучынскі.
Каментары