Касацыйны суд Егіпта адмяніў прысуд на пажыццёвае зняволенне для былога прэзідэнта краіны Махамеда Мурсі і прызначыў паўторнае разбіральніцтва, паведамляе BBC.
Гаворка ідзе пра крымінальную справу ў адносінах да Мурсі па абвінавачванні ў шпіянажы на карысць палестынскай групоўкі «ХАМАС».
На мінулым тыдні касацыйны суд адмяніў смяротны прысуд Мурсі.
Экс-прэзідэнт быў прысуджаны да смяротнага пакарання па крымінальнай справе аб удзеле ў масавых беспарадках і арганізацыі ўцёкаў зняволеных з турмы падчас паўстання ў 2011 годзе, якое прывяло да звяржэння рэжыму Хосні Мубарака.
Яшчэ адзін вынесены Мурсі прысуд — да 20 гадоў турмы па справе аб кровапраліцці ля прэзідэнцкага палаца ў 2012 годзе — застаецца ў сіле.
Усяго ў дачыненні да Мурсі, які знаходзіцца ў зняволенні з моманту яго звяржэння ў ліпені 2013 года, былі распачаты чатыры крымінальныя справы.
У 2012 годзе пасля звяржэння Хосні Мубарака Мурсі перамог на выбарах прэзідэнта краіны, стаўшы першым дэмакратычна абраным прэзідэнтам у гісторыі Егіпта. Праз год ён быў змешчаны з пасады ў выніку ваеннага перавароту.
З часу звяржэння ўрада Мурсі сябры руху «Браты-мусульмане» і іншыя яго прыхільнікі падвергліся пераследам.
Новы ваенны ўрад Егіпта абвясціў «Братоў-мусульман» тэрарыстычнай арганізацыяй, а дзейнасць руху апынулася пад забаронай.
Егіпецкія суды за кароткі час прысудзілі сотні прыхільнікаў Мурсі да смяротнага пакарання. Праваабаронцы падвяргалі крытыцы егіпецкую судовую сістэму і сумняваліся ў справядлівасці прысудаў.
Цяпер чытаюць
Пратэжэ лукашэнкаўскага фаварыта Баскава будуе акадэмію ў Бразіліі і Нью-Васюкі сусветнага маштабу6
Каментары