ЗША і Расія высвятляюць, чые скафандры лепшыя
23 красавіка стала вядома, што ЗША прапануюць выкарыстоўваць свае скафандры замест расійскіх «Арланаў» для выхадаў у адкрыты космас з борта калямесяцовай станцыі, якую абедзве краіны плануюць будаваць сумесна. Праз дзень расійскі бок заявіў, што лепш усё ж выкарыстоўваць расійскую спецвопратку для космасу.
«Я думаю, што гэта яны [ЗША] павінны імкнуцца выходзіць у космас у нашых скафандрах», — паведаміў РІАН сенатар Савета Федэрацы ад расійскай улады Крыму Сяргей Цэкаў (менавіта ў Крыму Расія размясціла цэнтр кіравання палётамі).
Паводле яго словаў, што тычацца бяспекі, «расейская прадукцыя зарэкамендавала сябе лепш, у ЗША было больш аварый і гібелі людзей».
«Карыстацца іхнімі скафандрамі? Не ведаю, я б не стаў. Хай з нас прыклад бяруць», — падсумаваў Цэкаў.
Пагадненне аб супольным стварэнні калямесяцовай станцыі Deep Space Gateway (пасля змены назвы — Lunar Orbital Platform — Gateway) Расія ды ЗША падпісалі ў 2017 годзе. Расія плануе вырабіць шлюзавую камеру для выхадаў экіпажаў у адкрыты космас. Чакаецца, што будаўніцтва станцыі пачнецца ў 2022 годзе, а расійскі адсек да яе далучаць у 2024 годзе.
Зараз на МКС выкарыстоўваюцца два віды скафандраў: расійскі «Арлан» і амерыканскі «EMU».
Абодва скафандры маюць шэраг пераваг і недахопаў. Напрыклад, пальчаткі EMU танчэйшыя, што робіць працу касманаўтаў больш зручнай. У сваю чаргу, вага «Арлана» роўная 110 кг супраць 136 кг амерыканскага аналага.
Цяпер чытаюць
Два сакрэты, дзякуючы якім адбылася кар'ера новага прэс-сакратара МЗС Руслана Варанкова3
Каментары