З продажу здымаюць 13 экстрэмісцкіх кніг, што выдала «Хрысціянская ініцыятыва»
У хуткім часе на тэрыторыі Беларусі будуць выключаныя з абароту 13 кніг, якія выдала і распаўсюджвала ЗАТ «Хрысціянская ініцыятыва». Згодна з рашэннем суда яны прызнаныя экстрэмісцкімі.
Пра гэта паведаміў БелаПАН начальнік аддзела па наглядзе за выкананнем правоў і свабод грамадзян Генеральнай пракуратуры Павел Радзівонаў.
Паводле яго слоў, першарадная задача Генпракуратуры заключаецца ў тым, каб забяспечыць канфіскацыю вышэйназванай экстрэмісцкай літаратуры
з усіх крыніцаў, даступных для пакупніка.«Цяпер праводзіцца абагульненне і аналіз усіх матэрыялаў па ЗАТ «Хрысціянская ініцыятыва» для наступнай прававой ацэнкі дзейнасці гэтага таварыства», — сказаў П.Радзівонаў.
19 снежня 2008 года суд Савецкага раёна Мінска па іску Генеральнай пракуратуры прызнаў, што 13 кніг з’яўляюцца экстрэмісцкімі, распальваюць нацыянальную і рэлігійную варожасць і ўтрымліваюць заклікі да насільных дзеянняў. Яны былі выдадзеныя ў Беларусі і Расіі і распаўсюджваюцца ў сетцы магазінаў «Праваслаўная кніга» ЗАТ «Хрысціянская ініцыятыва».
Паводле заключэння экспертаў, змест гэтых кніг носіць антысеміцкі характар і стварае негатыўны вобраз іудаізму.Пры вынясенні рашэння суддзя Эдуард Якубоўскі абапіраўся на артыкул 14 закона «Аб супрацьдзеянні экстрэмізму» і палажэнні Грамадзянскага працэсуальнага кодэкса Беларусі.
Генеральны дырэктар ЗАТ «Хрысціянская ініцыятыва» Уладзімір Чартовіч абскардзіў дадзенае рашэнне ў Мінскім гарадскім судзе. 26 лютага калегія гарадскога суда пакінула ў сіле рашэнне суда Савецкага раёна сталіцы аб прызнанні вышэйназваных выданняў экстрэмісцкімі.
Каментары