Ідуць суды над журналістамі, затрыманымі 15 лістапада: 7, 15, 25 сутак
Журналіст БелаПАН Андрэй Шаўлюга быў затрыманы ў нядзелю на маршы памяці Рамана Бандарэнкі. Сёння яго пакаралі арыштам на 15 сутак (суддзя Малашчанка).
Тарас Круцкіх (Тарналіцкі) атрымаў 25 сутак паводле двух пратаколаў (суддзя Шаціла).
Кацярыне Андрэевай далі 7 сутак арышту, прызналі вінаватай паводле 23.34 і 23.4 КаАП (суддзя — Вольга Няборская).
Паводле пратаколу Кацярыну затрымлівалі на вуліцы і яна прымала ўдзел у несанкцыянаваным масавым мерапрыемстве, хаця яна з 12 да 17-30 знаходзілася ў кватэры на Смарогскім тракце на 14 паверсе, што пацвердзіў на судзе сведка — гаспадар кватэры Дзмітрый, піша Белсат
Як распавяла Кацярына на судзе, яе затрымлівалі ў кватэры, дзверы выламалі, забеглі каля 10 спецназаўцаў. Яны не тлумачылі нічога, проста сказалі, каб збіраліся і ішлі з імі. Гвалту падчас затрымання не было.
У РУУС Каці стала кепска, яна адчула рэзкі боль ў галаве, яе вырвала, Каця страціла прытомнасць. Выклікалі хуткую, даставілі пад канвоем у 9-ю бальніцу. Нічога сур’ёзнага не знайшлі, але прапісалі пасцельны рэжым, поўны спакой і абавязковы візіт да неўролага на наступны дзень. Але раніцай 16 лістапада яе забралі ў РУУС, а адтуль даставілі ў ЦІП.
***
Усяго ў нядзелю былі затрыманыя — у Мінску, і іншых гарадах — 24 журналісты. 13 чалавек вызвалілі вечарам, або ў ноч на нядзелю (з пратаколамі і без). Відэааператар Андрэй Рабчык атрымаў учора 15 сутак.
Учора пасля Маршу пенсіянераў былі затрыманыя Аляксандра Квіткевіч і Максім Лаўрэцкі.
Цяпер чытаюць
«Вайна ўсё спіша». Беларускім удзельнікам гей-прайда ў Вільні пагражалі расправай ад імя беларускіх ваяроў за выкарыстанне бела-чырвона-белага сцяга148
Каментары