Казахскія вайскоўцы пры задушэнні пратэстаў насілі форму міратворцаў ААН. Арганізацыя занепакоеная
Казахстанскія вайскоўцы падчас задушэння пратэстаў у краіне выкарыстоўвалі блакітныя каскі міратворчых сілаў ААН, што было відаць на фотакартках, апублікаваных Associated Press. «Радыё Азатык» (казахскае аддзяленне «Радыё Свабода») высветліла, што адбывалася, у Міністэрства абароны Казахстана.
Прадстаўнік казахстанскага Міністэрства абароны паведаміў, што вайскоўцы ў блакітных касках — гэта частка батальёна КАЗБАТ, які супрацоўнічаў з ААН. Аднак яны не маюць права насіць форму міратворцаў без адпаведнай санкцыі з боку ААН.
ААН жа не ўводзіла свайго міратворчага кантынгенту на тэрыторыю Казахстана. Туды на просьбу прэзідэнта краіны Касым-Жамарта Такаева адправіліся толькі 2600 міратворцаў Арганізацыі Дамовы аб калектыўнай бяспецы. Да ААН яны не маюць ніякага дачынення.
ААН ужо выказала занепакоенасць гэтым фактам. «Краіны, якія прадстаўляюць ААН-кантынгент вайскоўцаў і паліцэйскіх, павінны ўжываць сімволіку ААН толькі ў тых выпадках, калі гаворка ідзе пра выкананне мандата міратворцаў ААН і ўдзел у міратворчых аперацыях ААН, зацверджаных Саветам бяспекі», — падкрэсліў прэс-сакратар арганізацыі Стэфан Дзюжарык.
Ці будзе гэта мець для Казахстана нейкія іншыя наступствы, апрача занепакоенасці — пакуль невядома.
Блытаніну вакол «блакітных касак» у Алматы яшчэ больш узмацнілі фота і відэа, якія з'явіліся 9 студзеня ў беларускіх дзяржаўных СМІ, на якіх відаць, як беларускія вайскоўцы носяць нарукаўныя значкі, якія, як некаторыя сцвярджалі, з'яўляюцца мадыфікаванымі знакамі адрознення Арганізацыі Аб'яднаных Нацый.
Але неўзабаве высветлілася, што на самай справе гэты знак адрознення належыць беларускай «міратворчай роце». Па дызайну ён амаль ідэнтычны знаку Арганізацыі Аб'яднаных Нацый, які паказвае Паўночнае паўшар'е ў асяроддзі вянкоў, што сімвалізуе свет. Да беларускіх знакаў адрознення дададзеныя скрыжаваныя мячы за паўсферай. Беларускае міратворчае падраздзяленне служыла раней сярод іншага ў Ліване.
Цяпер чытаюць
Выйшаў на свабоду былы топ-журналіст АНТ Дзмітрый Семчанка3
Каментары