Што паглядзець: «Шэрвуд» — адзін з найлепшых дэтэктываў за апошні час
Гэтую гісторыю пра маленькі горад і гучныя забойствы крытыкі называюць адным з найлепшых серыялаў ВВС за апошні час. Кажуць, у «Шэрвудзе» ёсць усё, на што толькі можна спадзявацца ў дэтэктыве.
Шэсць эпізодаў «Шэрвуда» заснаваныя на двух шакавальных забойствах, якія насамрэч адбыліся ў 2004 годзе. Месца трагедыі — раён Эшфілд графства Нотынгемшыр, недалёка ад месца, дзе вырас пісьменнік Джэймс Грэхэм, піша Guardian.
Грэхэм, які напісаў сцэнарый для серыяла, стварае кранальную і пераканаўчую гісторыю тых падзей і прадстаўляе нам горад, напоўнены смуткам і горыччу, асабістай варожасцю і глыбокімі ранамі.
Гэры Джэксан, верны член Нацыянальнага саюза гарнякоў, жыве ў мястэчку, дзе дамінуе Саюз дэмакратычных шахцёраў, які заняў не самую цвёрдую пазіцыю ў дачыненні да забастовак і прыватызацыі вугальнай прамысловасці.
Аднойчы Гэры знаходзяць мёртвым на вуліцы.
Першы падазраваны — мясцовы хлопец Дын, з якім Джэксан шмат спрачаўся апошнім часам.
Яшчэ адна лінія расследавання — гісторыя арышту Гэры за 1984 год, калі з Джэксана знялі абвінавачванне праз умяшальніцтва аднаго з лонданскіх паліцэйскіх. Раптам высвятляецца, што запісы пра арышт актывіста былі падробленыя.
Яшчэ адны падазроныя — мясцовая сям’я гандляроў наркотыкамі, чый сын некалі запужваў Гэры.
У дадатак, сваяк Кэці займаецца стральбой з лука, а зброя забойства Джэксана — арбалет. Кэці — сястра Джулі, жонкі Джэксана. Жанчыны з часам усё больш аддаляюцца адна ад адной, хаця яны і жывуць побач.
Але ж і Джэксан меў свае шкілеты ў шафе. Аказваецца, што мужчына шмат цікавіўся тайнай дзейнасцю паліцыі, і гэта прыводзіць следчых да нечаканай думкі наконт прычын яго забойства.
У любым выпадку, расследаванне смерці Джэксана ўражвае сваёй маштабнасцю.
«Шэрвуд» нечым нагадвае гульню ў боўлінг, і стваральнікі серыяла забіваюць страйк: мы маем сцэнарыста, які цудоўна ведае сферу, пра якую піша, і акцёраў, якія дэманструюць шыкоўную ігру. Гэта яшчэ і расказ пра 40 апошніх гадоў гісторыі брытанскіх шахцёраў, створаны з любоўю і ўвагай да падрабязнасцяў, але без ахвяравання сюжэтам ды напружаннем.
Брытанскія крытыкі прынялі «Шэрвуд» з захапленнем. У рэцэнзіі The Telegraph (як і ў The Guardian) серыял атрымаў 5 зорак з 5 і тытул «найлепшай за год драмы ВВС на гэты момант». Выданне The Independent дало серыялу 4 зоркі і назвала сцэнарый «спагадлівым ды яркім».
Рэйтынгі на вялікіх сусветных рэсурсах
IMDB — 7,7/10,
Rotten Tomatoes — 100%.
Каментары