Аналітыкі Conflict Intelligence Team вывучылі фота— і відэаматэрыялы з перавозкамі расійскай вайсковай тэхнікі чыгункай з Ніжагародскай вобласці на поўдзень Растоўскай вобласці — да мяжы з Данбасам.
Паводле даных аналітычнай каманды Conflict Intelligence Team (CIT), расійскія ўзброеныя сілы перакідваюць на фронт нядаўна сфармаваны 3-ці вайсковы корпус.
Відавочцы знялі поўныя саставы з комплексамі «Бук» і танкамі Т-80БВ і Т-90М. Пры гэтым, паводле інфармацыі з баз даных РЖД, саставы выйшлі з Муліна Ніжагародскай вобласці 22 і 24 жніўня і едуць у Няклінаўку на поўдні Растоўскай вобласці, размешчаную каля мяжы з Данецкай вобласцю Украіны.
Канчатковы пункт знаходзіцца найбліжэй да Данецкага і Запароскага ўчасткаў фронту, адзначаюць аналітыкі.
«Перавозка комплексаў «Бук« сведчыць аб перакідцы буйнога аб’яднання, напрыклад, арміі. У дадзеным выпадку можна выказаць здагадку, што гаворка ідзе аб перакідванні ўсяго 3-га корпусу, ці, прынамсі, той яго часткі, якая лічыцца боегатовай», — піша CIT.
Аналітыкі нагадалі, што аб фармаванні 3-га армейскага корпусу ў Муліне раней заяўляла ўкраінская выведка. Акрамя таго, аб прысутнасці добраахвотнікаў у гэтым ніжагародскім пасёлку пісала анлайн-выданне «Вёрстка», а даследчык Том Балак публікаваў знятыя ў Муліна фатаграфіі з сучаснай расейскай вайсковай тэхнікай.
«Многія даследчыкі здзіўляюцца, чаму ў руках дрэнна падрыхтаваных добраахвотнікаў апынуліся самыя сучасныя ўзоры расейскай тэхнікі. Мы бачым дзве верагодныя прычыны гэтага — немагчымасць аператыўна зняць старую тэхніку з кансервацыі і/або адсутнасць у расійскіх частках падрыхтаваных экіпажаў, якія можна было б зняць з фронту для засваення новых машын (гэта, у сваю чаргу, можа быць выклікана баявымі стратамі і распаўсюджанымі адмовамі ад удзелу ў «спецаперацыі»), — мяркуе CIT.
Цяпер чытаюць
Хто той неадэкватны беларус, які ляснуў дзіцятка галавой аб падлогу ў маскоўскім Шарамеццеве8
Каментары