У сталіцы праходзіць канферэнцыя «Праблемы інтэграцыі і інкарпарацыі ў развіцці Цэнтральнай і Усходняй Еўропы ў перыяд ранняга Новага часу».
У Мінску, у Інстытуце правазнаўства (Караля, 3) праходзіць канферэнцыя «Праблемы інтэграцыі і інкарпарацыі ў развіцці Цэнтральнай і Усходняй Еўропы ў перыяд ранняга Новага часу».
Канферэнцыя арганізавана пры ўдзеле Беларускага інстытута правазнаўства і Інстытута Польскага ў Мінску.
У ёй бяруць удзел даследчыкі з сямі краін — Беларусі, Польшчы, Украіны, Расіі, Літвы, Германіі і Вялікабрытаніі. Адкрываючы канферэнцыю, старшыня савета Інстытута правазнаўства Сцяпан Сокал адзначыў, што «для нас каштоўна тое, што досвед мінулых гадоў мы можам скарыстаць у вывучэнні сённяшняй сітуацыі. Тэрміны інкарпарацыя і інтэграцыя і сёння актуальныя для нас. Гэта сучасная праблематыка».
Паводле словаў іншага суарганізатара — кіраўніка Інстытута польскага ў Мінску Пятра Казакевіча — Беларусь паступова становіцца адным з цэнтраў вывучэння гісторыі Цэнтральнай Еўропы.
«Я некалі сказаў, што Мінск павінен стаць цэнтрам даследаванняў ВКЛ, Рэчы Паспалітай. Сёння мы бачым, што гэтая ідэя набліжаецца да рэалізацыі», — адзначыў спадар Казакевіч.
Акрамя вядомых даследчыкаў з краін, што знаходзяцца на тэрыторыі былой Рэчы Паспалітай, а таксама Расіі, Вялікабрытаніі і Германіі, у канферэнцыі возьме ўдзел пасол Рэспублікі Польшча ў Беларусі — доктар Генрык Літвін.
Пасол адзначыў ва ўступным слове, што «хацеў бы ўдзельнічаць у канферэнцыі больш навукова, чым афіцыйна. Хочацца вярнуцца на некалькі дзён да занятку, які лічу вельмі важным у сваім жыцці». Доктар Генрык Літвін выступіць з дакладам на тэму «Кіеўшчына, Валынь і Брацлаўшчына ў 1569 г.: паміж інкарпарацыяй і уніяй».
Канферэнцыя «Праблемы інтэграцыі і інкарпарацыі ў развіцці Цэнтральнай і Усходняй Еўропы ў перыяд ранняга Новага часу» скончыцца ў пятніцу 16 кастрычніка. На суботу для ўдзельнікаў запланавана экскурсійная праграма Крэва — Баруны — Гальшаны.
Цяпер чытаюць
«Дзед будзе глядзець асабіста. Калі яму спадабаецца…» Зянковіч расказаў, як з ім запісвалі першае інтэрв'ю ў СІЗА КДБ14
Каментары