5-гадовая дзяўчынка за раз патраціла амаль 4000 даляраў у інтэрнэт-краме. Адбылося гэта з тэлефона маці без яе ведама
«Я проста хацела гэта, і я гэта замовіла».
Пяцігадовая Ліла Валіска з Вэстпорта, штат Масачусетс, патраціла амаль 4000 даляраў тады, калі проста гуляла на тэлефоне сваёй маці. Тая ў сваю чаргу пра гэта спачатку нічога не ведала, а потым была шакаваная.
Пра гэту гісторыю 7 красавіка напісаў часопіс People.
Джэсіка Нуньес, маці дзяўчынкі, была ў шоку, калі на яе пошту пачалі прыходзіць паведамленні аб пацвярджэнні даставак цацак і іншых рэчаў, якія сама жанчына ніколі не купляла.
«Спачатку, калі я пабачыла электронны ліст, які пацвярджае «адпраўку пакупкі», то падумала, што гэта ашуканства альбо спам. Але потым я ўсё ж такі адкрыла інтэрнэт-краму Amazon і была шакаваная, калі пабачыла, што пакупкі зрабіла мая дачка!» — распавяла жанчына часопісу People.
У гісторыі замоў маці пабачыла 10 дзіцячых велатрэнажораў, цацачны джып і 10 пар каўбойскіх ботаў. Пры гэтым яе дачка Ліла не ўмее ні чытаць, ні пісаць, але здзейсніла за 15 хвілін пакупак на суму крыху менш за 4000 даляраў (звыш 10 тысяч рублёў), хоць частку замоў маці ўсё ж паспела адмяніць.
А дачка ў сваю чаргу заявіла, што не шкадуе аб сваіх пакупках.
«Я проста хацела гэта, і я гэта замовіла», — такімі словамі Ліла пракаментавала свой учынак.
Пры гэтым Джэсіка Нуньес адзначыла, што яе дачка выдатна ведала пра Amazon, таму што тая некалькі разоў бачыла, як маці карысталася сэрвісам. Але дзіця не мела ўласнага тэлефона, а маці дазваляла ёй пагуляць у гульні, каб проста яе супакоіць. Джэсіка нават не падазравала, што яе дачка будзе здольная пракруціць усю гэтую гісторыю з замовамі так спрытна.
Тым не менш, па словах маці, Ліла ў выніку ў якасці пакарання была пазбаўленая ўсіх замоў, што паспелі прыйсці.
Цяпер чытаюць
Павел Вінаградаў упершыню расказвае, як яго закінулі на самае дно беларускай турмы. Як гэта — калі суседзі за цыгарэту ядуць чужое гаўно18
Каментары