Дальнабойнікі кажуць, што праз шматлікія штрафы вельмі павольна рухаецца чарга фур на пункт пропуску «Казловічы» каля Брэста. Калейка складае ўжо прыкладна 20 кіламетраў, як піша «Ганцавіцкі час».
Як расказаў «Ганцавіцкаму часу» брэсцкі кіроўца Юрый, чарга шмат у чым вырасла праз тое, што многім даводзіцца выплачваць штрафы па 20 базавых адзінак (540 рублёў).
«Чарга сабралася таму, што машыны, якія выехалі да 3 ліпеня, пры вяртанні павінны аплаціць штраф у памеры 20 базавых велічынь. Нават калі выехаў 2-га чысла і заехаў у тэрмінал 3-га чысла, таксама абавязаныя заплаціць (уводзілі забарону на транзіт транспартных сродкаў і потым адмянілі).
Нават выпісаныя мытняй патрабаванні на 10 сутак знаходжання не вызваляюць ад выплаты штрафу. Не пагражае штраф тым, хто выехаў пасля 3 ліпеня. Чаканне для выплаты штрафу ў тэрмінале каля 30 гадзін», — расказаў суразмоўца.
Дальнабойнік стаіць у чарзе з вечара 4 ліпеня, але кажа, што «прасоўвання амаль ніякага». «Стаю за Косічамі. Мост тут чыгуначны. 20 кіламетраў калейка — гэта вельмі шмат». Колькі дзён давядзецца стаяць у чарзе, сказаць ён не бярэцца.
Іншы суразмоўца «Ганцавіцкага часу», Аляксей працуе лагістам у транспартнай кампаніі ў Польшчы. Ён расказаў, што ў чарзе некалькі дзён стаіць ягоны кіроўца.
«Так, ёсць такая праблема. Тыя, хто перачапіўся ў тэрмінале пасля 2 ліпеня, павінны плаціць 20 базавых штрафу. Штрафы паяюць усім, нават калі ты ўмоўна перачапіўся да 2 ліпеня. У мяне канкрэтна крайняя перачэпка была 1-га чысла. Думаў, да 3-га чысла мой кіроўца з'едзе. Але вось стэлефанаваўся з ім, за суткі ніякага руху. Як стаяў каля Камянецкага кальца, так і стаіць.
У калейцы кажуць, што мытнікам няважна, калі ты перачапіўся, хоць ёсць паперы. Усё роўна 20 базавых. Мне яшчэ не прыляцела, але я адчуваю, што прыляціць».
Лагіст кажа, што павольны рух чэргаў тлумачылі спачатку рамонтам, потым адсутнасцю святла, а цяпер афармленнем штрафаў.
У пачатку ліпеня вялізныя чэргі фур збіраліся да гэтага пагранпераходу і з польскага боку. Але лагіст Аляксей кажа, што цяпер на тым баку калейка значна паменшылася.
Цяпер чытаюць
«Стаяць на сваім, кожны наколькі можа!». Вялікая гутарка з Наталляй Дулінай пра гопнікаў з ГУБАЗіКа, Калеснікаву і што там у каго ў калоніі5
Каментары