Прадаўцы аўтамабіляў просяць адмяніць рэгуляванне цэнаў у іхняй сферы
Беларуская аўтамабільная асацыяцыя (БАА) прапанавала выключыць легкавыя аўтамабілі з-пад дзеяння нормаў пастановы Савета Міністраў № 713 «Аб сістэме рэгулявання цэнаў», згодна з якімі цэны на легкавікі рэгулюе дзяржава. Адпаведнае паведамленне размясцілі на сайце БАА.
Сваю прапанову арганізацыя грунтуе на матэрыялах праведзенага перад гэтым міні-даследавання. Для яго БАА запрасіла ў Белстата інфармацыю пра індэксы спажывецкіх цэн (ІСЦ) на легкавыя аўтамабілі за перыяд са студзеня 2023 года па люты 2024-га.
Паводле атрыманых звестак, ІСЦ у снежні 2023 года склаў 105,57% да ўзроўню снежня 2022-га, а ў лютым 2024 года — 102,88%. Гэта значыць, прыкметнае зніжэнне цэнаў. А прычына гэтага ў тым, што, як лічыць БАА, на рынку продажаў новых легкавікоў дамінуе айчынная кампанія «БелДжы», а кантроль за цэнамі гэтага вытворцы выконвае дзяржава «з дапамогай уладальніцкага нагляду ў асобе Мінпрама». А іншыя аўтадылеры вызначылі сваю цэнавую палітыку з аглядкай на лідара рынку.
У асацыяцыі адзначылі, што праз пастанову Саўміна «Аб сістэме рэгулявання цэнаў» беларускі аўтабізнэс «пазбавіўся традыцыйных у сусветнай практыцы інструментаў стымулявання продажаў». Гэта, як лічаць у БАА, неэфектыўная сістэма аўтабонусаў (стымуляцыйных выплат), зарэгуляваны аўталізінг, магчымасці рэкламы і іншае.
«Узраслі агульныя працавыдаткі, сфармаваўся залішні дакументаабарот, істотна вырасла верагоднасць здзяйснення тэхнічных памылак пры афармленні дакументаў. З улікам вышэйпададзенага ўяўляецца мэтазгодным выключыць легкавыя аўтамабілі з-пад дзеяння нормаў пастановы № 713», — заявілі ў асацыяцыі.
Чытайце таксама:
На станцыях тэхагляду пачалі афармляць дазволы для аўто на тры гады
Цяпер чытаюць
«Арабскі шэйх засунуў даляры ў кішэню». Блогер Vadimati Ермашук цяпер працуе ахоўнікам люксавых буцікоў5
Каментары