У Ізраілі апублікаваны спіс 33 закладнікаў, якіх павінны вызваліць на першым этапе пагаднення аб спыненні агню з палесцінскай групоўкай ХАМАС, прызнанай тэрарыстычнай у ЗША і ЕС, піша Радыё Свабода.
У спісе ёсць імёны сям'і Бібасаў з кібуца Нір-Оз — у закладнікі была захоплена сямейная пара з дзецьмі, малодшаму з якіх на момант нападу джыхадыстаў было дзевяць месяцаў. Кфір Бібас з'яўляецца самым малодшым закладнікам.
У спісе таксама знаходзіцца імя Аляксандра Труфанава. У яго, акрамя ізраільскага, ёсць расійскае грамадзянства. Відэаролікі з Труфанавым некалькі разоў публікавала групоўка «Ісламскі джыхад», прызнаная тэрарыстычнай у ЗША, Еўразвязе, Расеі і шэрагу іншых краін.
Спіс не адлюстроўвае парадак вызвалення захопленых джыхадыстамі закладнікаў і не паказвае іх стан. Ізраіль мяркуе, што большасць з іх жывыя.
Заявы з імёнамі вызваленых у ходзе здзелкі будзе публікаваць канцылярыя прэм'ер-міністра.
У выніку нападу ісламісцкіх груповак на поўдзень Ізраіля 7 кастрычніка 2023 года ў закладнікі былі захопленыя і вывезеныя ў сектар Газа каля 250 чалавек. Частку з іх вызвалілі падчас абмену. Паводле ацэнак ізраільскіх спецслужбаў, у палоне ХАМАС застаецца 99 закладнікаў, частка з іх мёртвыя.
Пасля нападу ХАМАС Ізраіль пачаў у Газе поўнамаштабную ваенную аперацыю. Паводле звестак падкантрольнага ХАМАС Міністэрства аховы здароўя Газы, былі забітыя больш за 45 тысяч жыхароў сектара.
Каментары