У Грузіі выставілі абвінавачанне экс-прэм’еру Гарыбашвілі

Як заявіў на брыфінгу генеральны пракурор Грузіі Георгі Гваракідзэ, Гарыбашвілі выстаўлена абвінавачанне па артыкуле 194 Крымінальнага кодэкса Грузіі аб адмыванні грошай, спалучанае з атрыманнем даходу ў асабліва буйным памеры.

Згодна з пракуратурай, Гарыбашвілі, які займаў у 2019—2024 гадах пасады міністра абароны і прэм’ер-міністра Грузіі, па грузінскім заканадаўстве не меў права займацца якой-небудзь прадпрымальніцкай дзейнасцю і атрымліваць любое ўзнагароджанне, акрамя заработнай платы службовай асобы.

Нягледзячы на гэта, ён тайна займаўся бізнесам і атрымліваў даходы незаконнага паходжання ў асабліва буйным памеры, дадаюць улады.

У пракуратуры кажуць, што Гарыбашвілі цалкам прызнаў віну. Пракуратура звернецца ў суд з хадайніцтвам аб выбары закладу 1 мільён лары (368 тыс. даляраў) у якасці меры стрымання, які можа быць забяспечаны як грашовымі сродкамі, так і нерухомасцю. Акрамя гэтага, у пракуратуры маюць намер патрабаваць здачу пашпарта і накладанне забароны на выезд Гарыбашвілі з краіны ў якасці дадатковых абавязкаў абвінавачанага.

Па словах генпракурора Георгія Гваракідзэ, з мэтай легалізацыі часткі незаконных даходаў Гарыбашвілі ўказваў непраўдзівыя звесткі ў дэкларацыях, быццам атрымліваў штогадова грашовыя сумы ў падарунак ад члена сям’і. Акрамя таго, для легалізацыі маёмасці ён набыў і зарэгістраваў на звязаную з ім асобу два аўтамабілі, а таксама праз члена сям’і набыў 100% акцый кампаніі, якая валодала нерухомасцю. Паралельна на зарэгістраванае на імя члена яго сям’і ТАА былі ажыццёўлены інвестыцыі.Гарыбашвілі лічыўся адным з самых блізкіх і верных кадраў заснавальніка кіруючай партыі, мільярдэра Бідзіны Іванішвілі.

Да прыходу ў палітыку ён працаваў у кампаніях, звязаных з Іванішвілі. Пасля змены ўлады і перамогі «Грузінскай мары» на выбарах у 2012 годзе займаў каля года пасаду міністра ўнутраных спраў ва ўрадзе. Потым змяніў на пасадзе прэм’ера самога Іванішвілі, які заявіў, што сыходзіць з палітыкі.

У снежні 2015 года Гарыбашвілі нечакана сышоў у адстаўку, вярнуўшыся на палітычную арэну толькі праз чатыры гады спачатку ў рангу палітычнага сакратара ў кіруючай партыі, а потым заняў пасаду міністра абароны.

У 2021 годзе ён другі раз стаў прэм’ер-міністрам, змяніўшы Георгі Гахарыя. На пасадзе кіраўніка ўрада ён заставаўся да лютага 2024 года. Тады, пасля вяртання ў палітыку Іванішвілі, які стаў ганаровым старшынёй кіруючай партыі, ён памяняўся месцамі з Іраклі Кабахідзэ і перайшоў з крэсла прэм’ера на пасаду старшыні партыі.

Рашэнне пакінуць пасаду кіраўніка ўрада за дзевяць месяцаў да парламенцкіх выбараў у Грузіі сам Гарыбашвілі тлумачыў «ўнутранай дэмакратыяй» ў партыі, якая адкрывае магчымасці іншым паспяховым лідарам «Грузінскай мары», але крытыкі ўладаў упэўненыя, што рашэнне аб перастаноўках было прынята асабіста Іванішвілі.

У красавіку гэтага года ён заявіў, што сыходзіць з палітыкі, і яго палітычная кар’ера завершана.

Пры гэтым, як і раней, ён хвалiў Іванішвілі і ўпэўніваў, што застаецца верным прыхільнікам «Грузінскай мары».

• 0
• 0
• 0
• 0
• 0
• 0
• 0
• 0