«Новы час» атрымаў чарговае папярэджанне — гэтым разам ад Мінгандлю
«Новы час» зьмясьціў інфармацыю пра перадачы спадарожнікавага каналу Белсат.
Міністэрства гандлю палічыла гэта рэклямай. Распавядае галоўны рэдактар «Новага часу» Аляксей Кароль:
«Складзены пратакол — я яго ўжо атрымаў, і справа ўжо перададзеная ў суд. Чакаем позву з суду. Гэта адміністрацыйная справа. Мы не пагадзіліся, што гэта рэкляма. Гэта інфармацыя, якая зробленая на бязвыплатнай аснове. Канкрэтна ў чым яны нас абвінавачваюць — гэта тое, што рэкляма павінна ўтрымліваць нумар ліцэнзіі, адрас рэклямадаўцы, а гэтага ў нас няма. Мы далі тлумачэньні, што гэта не рэкляма, а гэта абмен інфармацыяй, і грошы за гэта ніхто не атрымоўваў. Мы праінфармавалі, яны калі‑нікалі інфармуюць, пра што піша «Новы час». І вось справу будуць разглядаць цяпер у судзе».
Газэце «Новы час» пагражае штраф ад 20 да 50 базавых велічыняў.
Літаральна тыдзень таму тыднёвік «Новы час» атрымаў папярэджаньне ад Міністэрства інфармацыі.
Газэту вінавацяць у тым, што ў выходных дадзеных не пазначаныя імя па бацьку галоўнага рэдактара, штрыхавы ідэнтыфікацыйны код, а таксама не названы рэспубліканскі орган дзяржаўнага кіраваньня ў сфэры масавай інфармацыі.
А ў Горадні будуць судзіць грамадзкага распаўсюдніка, у чыёй машыне знайшлі пачак газэт «Новы час». У пратаколе міліцыянты запісалі, што гэта «спроба распаўсюду».
Цяпер чытаюць
Зніклы Котаў выехаў з Турцыі морам — магчыма, у бок Расіі3
Каментары