Дробная помста: Дзмітрыю Усу доўгатэрміновае спатканне з жонкай скарочана да аднаго дня
За тое, што адмовіўся пісаць прашэнне ад памілаванні на імя Лукашэнкі.
Зняволенамуэкс-кандыдату ў прэзідэнты Дзмітрыю Усу доўгатэрміновае спатканне з жонкай Яўгеніяй скарочана да аднаго дня.
Яўгенія Ус паведаміла БелаПАН, што збіралася паехаць у папраўчую калонію ў Магілёве, дзе ўтрымоўваецца яе муж, 5 верасня. «Раней планавалася, што спатканне будзе з 5 па 7 верасня. Аднак учора Дзмітрый патэлефанаваў з турмы і паведаміў, што спатканне скарочана да аднаго дня.
Ён сказаў, што яму прапанавалі напісаць ліст аб памілаванні на імя Аляксандра Лукашэнкі, але ён гэта зрабіць адмовіўся. У выніку начальнік калоніі пазбавіў яго доўгатэрміновага спаткання і замяніў яго аднадзённым 8 верасня»,— сказала жонка Уса.
Таксама яна паведаміла, што на пазамінулым тыдні выслала мужу бандэроль з неабходнымі медпрэпаратамі. «Дзмітрый пацвердзіў, што такая бандэроль у калоніі атрымана, аднак лекаў з яе яму не выдаюць, нягледзячы на тое, што ўсе лекі былі выпісаныя турэмным урачом», — адзначыла Яўгенія.
Яна расцэньвае гэта як націск на былога кандыдата ў прэзідэнты, каб ён усё ж напісаў прашэнне аб памілаванні.
Тым не менш, адзначыла Яўгенія, Дзмітрый Ус пачувае сябе лягчэй, паколькі «ўжо адаптаваўся да ўмоў у калоніі».
Дзмітрый Ус быў прызнаны вінаватым у арганізацыі масавых беспарадкаў у Мінску 19 снежня 2010 года. 26 мая суд Ленінскага раёна сталіцы прыгаварыў яго да пяці з паловай гадоў пазбаўлення волі ў калоніі ўзмоцненага рэжыму. 19 ліпеня Мінскі гарадскі суд пакінуў прыгавор райсуда без змяненняў.
Цяпер чытаюць
Маладую бібліятэкарку з Горак асудзілі за пратэсты2
Каментары