У Дзень горада Мінска, 10 верасня, у Нацыянальным мастацкім музеі Беларусі пройдзе мастацка-асветніцкі праект «Вераснёвая ноч у Мастацкім».
Як паведамілі ў музеі, мерапрыемства адбудзецца з 12.00 да 24.00. На пляцоўцы перад будынкам установы музейная студыя «У гасцях у Цюбіка» арганізуе дзіцячы пленэр «Мой родны Мінск», пазней тут адбудзецца паказ мод ад ААТ «Цэнтр моды».
У вестыбюлі музея шклозавод «Нёман» прадставіць выставу-продаж сваіх вырабаў з мастацкага шкла. У 14.00 тут жа аркестр выкладчыкаў музычнай школы № 6 «Макдоў» пад кіраўніцтвам Святланы Даўжэнкі выканае для гасцей праекта музычныя кампазіцыі. Вечарам выступіць з канцэртам флагман сталічнага фрык-руху гурт «Касіяпея», які выконвае нешта сярэдняе паміж сінці-попам і поп-рокам, змешваючы музыку з незвычайнымі па сэнсе тэкстамі.
У канферэнц-зале музея РУП «Белвідэацэнтр» прэзентуе фільм і арганізуе продаж кампакт-дыскаў пра экспазіцыі музея «З залы ў залу пераходзячы…». Там жа пройдзе прэзентацыя і продаж кніг пісьменніка Віктара Карамазава пра беларускіх мастакоў.
У малой зале мастак Руслан Вашкевіч прадставіць арт-праект «Музей», а ў зале «Жывапіс Беларусі першай паловы XIX стагоддзя» адбудзецца камерны VIP-канцэрт пад назвай «Начны клавесін».
***
Дзень горада Мінска традыцыйна адзначаецца ў другую суботу верасня. Як паведамлялася раней, усяго ў сталіцы на святкаванні Дня горада 10–11 верасня адбудзецца прыкладна 60 мерапрыемстваў. Асноўныя з іх пройдуць ў Верхнім і Ніжнім горадзе, каля Нацыянальнай бібліятэкі, Палаца спорту, «Мінск-Арэны», у парку Перамогі. Мерапрыемствы пройдуць таксама ва ўсіх раёнах Мінска.
Каментары