Віцэ-прэм'ер Расіі Кудрын пакінуў пасаду пасля публічнай сваркі з Мядзведзевым

Віцэ-прэм’ер-міністр фінансаў Расіі Аляксей Кудрын 26 верасня пайшоў у адстаўку пасля публічнай сваркі з прэзідэнтам краіны Дзмітрыем Мядзведзевым.

Расійскі кіраўнік выказаў незадаволенасць заявай Кудрына ў ЗША пра тое, што ён не будзе працаваць ва ўрадзе пад кіраўніцтвам Мядзведзева. Прычына — розныя погляды на бюджэтныя расходы, уключаючы вайсковыя.

«Дысцыпліну і субардынацыю ва ўрадзе ніхто не адмяняў, — прыводзіць прэс-служба Крамля словы Мядзведзева на пасяджэнні камісіі па мадэрнізацыі і тэхналагічным развіцці эканомікі Расіі, што прайшло ў панядзелак. — 

Калі, Аляксей Леанідавіч, вы не згодныя з курсам прэзідэнта, а ўрад праводзіць прэзідэнцкі курс, у вас ёсць толькі адно выйсце, і вы ведаеце, якое — падаць у адстаўку…

Кудрын заявіў, што параіцца з прэм’ер-міністрам Уладзімірам Пуціным.

Хутка стала вядома, што віцэ-прэм’ер падаў у адстаўку.

Паводле інфармацыі шэрагу расійскіх СМІ, Кудрын разлічваў, што стане прэм’ер-міністрам пры прэзідэнце Пуціне. Аднак на апошнім з’ездзе партыі «Адзіная Расія» Пуцін, якога Мядзведзеў вылучыў кандыдатам у прэзідэнты, заявіў, што цяперашняму прэзідэнту будзе прапанавана пасада прэм’ер-міністра.

У кіраўніцтве Расіі Аляксей Кудрын быў адным з найбольш паслядоўных крытыкаў беларускай эканамічнай мадэлі, за што ўдастойваўся рэзкіх эпітэтаў з боку Аляксандра Лукашэнкі.

Самы востры публічны канфлікт адбыўся ў канцы мая 2009 года, калі Расія адклала выдзяленне Беларусі чарговага траншу крэдыту ў памеры 500 млн. долараў. Паводле слоў Кудрына, выдзяленне траншу залежыць ад эканамічнай палітыкі дзяржавы. «Гэта звязана з тым, што ў беларускай эканоміцы ўзмацняюцца дыспрапорцыі і дысбалансы, — растлумачыў тады віцэ-прэм’ер. — На наш погляд, урад Беларусі прымае недастатковыя меры, каб забяспечыць плацежаздольнасць сваёй эканомікі». У Беларусі, паводле яго слоў, «ідзе адцягванне крызісных з’яў штучным спосабам» за кошт «масіраванай крэдытнай падтрымкі».

Лукашэнка даў адказ наступным днём: «Мы ўчора назіралі цікавую сітуацыю, калі прэзідэнт Беларусі сядзіць з Уладзімірам Пуціным і абсалютна на дружалюбнай ноце абмяркоўвае пытанні, пачынаючы ад прыватных і заканчваючы дзяржаўнымі. І нармальнае ідзе абмеркаванне. А ў гэты час Кудрын дае прэс-канферэнцыю да пасяджэння саюзнага Саўміна, сутнасць якой — пасеяць паніку ў Беларусі. Ён поўнасцю кансалідаваўся з нашымі адмарозкамі, якія тут на заходнія грошы вякаюць і пачынаюць нас вучыць працаваць».

• 0
• 0
• 0
• 0
• 0
• 0
• 0
• 0