Міністэрства па падатках і зборах просіць Мінюст ініцыяваць працэс ліквідацыі БХК

Міністэрства па падатках і зборах просіць Міністэрства юстыцыі ініцыяваць працэс ліквідацыі РПГА «Беларускі Хельсінскі камітэт». Пра гэта старшыні БХК Алегу Гулаку паведамілі ў Мінюсце.

Як адзначаецца на сайце праваабарончай арганізацыі, паводле беларускага заканадаўства, пры наяўнасці двух папярэджанняў, вынесеных грамадскаму аб’яднанню за год, Мінюст мае права падаць у суд патрабаванне аб прыпыненні дзейнасці ці ліквідацыі арганізацыі.

Першае ў 2011 годзе папярэджанне БХК атрымаў 12 студзеня за «парушэнне заканадаўства аб грамадскіх аб’яднаннях, сродках масавай інфармацыі, распаўсюджванне недакладнай інфармацыі». 6 чэрвеня Мінюст вынес другое папярэджанне арганізацыі за «парушэнні падатковага заканадаўства, якія носяць працяглы характар». Абскарджанне гэтага папярэджання ў судовым парадку не дало праваабаронцам станоўчых вынікаў.

Паводле меркавання афіцыйных асоб,

БХК павінен заплаціць у бюджэт больш за 240 млн. рублёў падаткаў і штрафных санкцый па выкарыстаных у 2002–2003 гадах грантах Еўракамісіі,

Інспекцыя Міністэрства па падатках і зборах па Маскоўскім раёне Мінска пацвердзіла мэтавае выкарыстанне атрыманых сродкаў. Разам з тым інспекцыя аднесла грантавыя сродкі да даходаў ад пазарэалізацыйнай дзейнасці і налічыла суму да выплаты.

БХК лічыць рашэнне інспекцыі незаконным і абскардзіў яго ў судовым парадку. Нацыянальныя суды ўсіх інстанцый пастанавілі, што праваабаронцы нічога не павінны выплачваць у бюджэт.

Аднак напярэдадні прэзідэнцкіх выбараў 2006 года, маніторынг якіх ажыццяўляў БХК, рашэнні гаспадарчых судоў былі перагледжаныя прэзідыумам Вышэйшага Гаспадарчага суда. Інспекцыя Міністэрства па падатках і зборах апісала і выключыла маёмасць БХК на суму 255 тысяч рублёў. Рахункі арганізацыі арыштавалі.

Разам з тым у 2006 годзе Дэпартамент фінансавых расследаванняў Камітэта дзяржкантролю спыніў у сувязі з адсутнасцю падзеі злачынства крымінальную справу, распачатую за ўхіленне ад выплаты падаткаў у дачыненні да службовых асоб БХК.

Цяпер БХК вядзе перапіску з Мінюстам па гэтай праблеме.

Варта адзначыць, што Беларускі Хельсінскі камітэт — адзіная афіцыйна зарэгістраваная ў Беларусі праваабарончая арганізацыя рэспубліканскага ўзроўню. БХК ажыццяўляе маніторынг усіх выбарчых кампаній, рыхтуе экспертныя заключэнні па найбольш рэзанансных справах, аказвае прававую падтрымку грамадзянам у 11 гарадах краіны.

• 0
• 0
• 0
• 0
• 0
• 0
• 0
• 0