Polšča pryvablivaje turystaŭ santechnikam.
«Žyviacie ŭ Francyi? U vas ciakuć truby? Polski pryhažun-santechnik nie pryjedzie dapamahčy vam! Pryjaždžajcie lepiej vy da nas na kurort!» Takija nadpisy azdablali plakaty z vyjavaj santechnika-płejboja, što ŭ červieni źjavilisia ŭ Francyi. Reklamnaja kampanija Polskaha turystyčnaha adździaleńnia ŭ Paryžy (Polish National Tourism Office) daścipna padśmiejvajecca z francuzaŭ, jakija prahałasavali suprać Kanstytucyi EZ. Adnoj z asnoŭnych pryčynaŭ była bojaź francuzaŭ pierad pryvidam: mityčnym vobrazam «polskaha santechnika», jaki adbiare ŭ francuzaŭ pracu, pahadziŭšysia pracavać za kapiejki. Polski santechnik staŭ hałoŭnym župiełam ahitkampanii levych suprać Eŭrakanstytucyi.
Upieršyniu santechnik źjaviŭsia na internet-staroncy paryskaha adździaleńnia «Pol- skaj turystyčnaj arhanizacyi». Jon zrabiŭ furor. Za try letnija miesiacy kolkaść vizytaŭ u paryski ofis PTA pavialičyłasia na 38% (u paraŭnańni z adpaviednym peryjadam 2004 h.). Centar naviedali 9,8 tys. zacikaŭlenych u pryjeździe ŭ Polšču. Amal na 40% uzrasła taksama kolkaść zapytaŭ nakont krainy, što vysyłalisia ŭ paryskaje adździaleńnie PTA elektronnaj poštaj. A kolkaść naviedvańniaŭ ŭeb-sajtu kampanii padskočyła ŭ dziesiać razoŭ. «Kampanija mieła nadzvyčajny pośpiech», — havoryć Kamiła Łučyńska-Vilčak, specyjalist PTA pa suviaziach z hramadzkaściu. Užo viadoma, što Polšču ŭ hety letni sezon naviedała bolš turystaŭ z Francyi, čym zvyčajna (rost skłaŭ kala 20—30%).
Tvaram reklamnaj kampanii staŭ 21-hadovy Piotar Adamski. U kambinezonie, abviešany santechničnym ryštunkam, muskulisty pryhažun na fonie horaŭ i račułak zaprašaje ŭsich achvotnych naviedać Polšču. Stvaralniki reklamy zabili dvuch zajcoŭ: zrabili reklamu Polščy i źmiakčyli nastroi francuzaŭ.
Pra niezvyčajnuju kampaniju pisali hazety va ŭsim śviecie — ad Aŭstralii da Kalumbii. Usiaho źjaviłasia 250 publikacyj u presie. Usie artykuły byli sabrany i vydadieny ŭ formie knihi. Jaje miarkuje raspaŭsiudžvać PTA, jakaja naleta źbirajecca vydatkavać jašče bolš hrošaj na reklamu.
Kolki sioleta tracili na viasielli ŭ Biełarusi? Sabrali realnyja ličby tych, chto pabyvaŭ u ZAHSie6
Kamientary