U San-Luisie (Arhientyna) prajšoŭ čempijanat śvietu pa versii FIDE (prezydent — Kirsan Ilumžynaŭ).
Dahetul čempijonam śvietu byŭ Rustam Kasymžanaŭ z Uzbekistanu, jaki zavajavaŭ tytuł padčas spabornictvaŭ u Livii, dzie nie hulali najmacniejšyja. Sioleta Kasymžanava mieŭsia praekzamenavać «hrozny Hary». Ale Kasparaŭ niečakana dla mnohich pakinuŭ šachmaty ŭzimku. Heta stała ŭdaram pa prestyžy hulni, i FIDE terminova pieraŭtvaryłasia ŭ pažarnuju kamandu. Urešcie, damovilisia pra kruhavy turnira dla top-elity (vosiem čałaviek) z pryzavym fondam u miljon dalaraŭ.
Rejtynh-favarytami ŭ San-Luisie byli baŭharyn Viesialin Tapałaŭ, indus Višy Anand. Ich dy Petera Leka sam Kasparaŭ nazyvaŭ hałoŭnymi pretendentami na pieršynstvo. Feministki ž trymali kułaki za Judyt Połhar — adzinuju žančynu ŭ turniry. Ale vuhorka nia spraŭdziła ich čakańniaŭ, zaniaŭšy apošniaje miesca — 4,5 bała z 14. Pieršynstvavaŭ Tapałaŭ: šeść pieramoh, vosiem ničyich (10 bałaŭ). Druhoje miesca ŭ Ananda, treciaje — u rasiejca Piatra Śvidlera (pa 8,5 bała).
Postać novaha čempijona śvietu znajomaja amataram: ź siaredziny 1990-ch jaho imia pastajanna milhaje ŭ šachmatnych navinach. Heta 30-hadovy chałaściak, što vyras u horadzie Rusie, na rumyna-baŭharskim pamiežžy. Mižnarodnaha majstra zavajavaŭ u 14 hadoŭ, hrosmajstar staŭ z 17-ci. Jahony styl kamentatary paraŭnoŭvajuć z alochinskim abo fišeraŭskim. Prahmatyčny spartoviec, mocny ŭ lubych pazycyjach: bliskuča zaviaršyŭšy pieršy kruh u Arhientynie, u druhim achvotna pahadžaŭsia na ničyi, aby zachavać adryŭ ad kankurentaŭ. U adroźnieńnie ad čempijona-2002 ukrainca Rusłana Panamarova, Tapałaŭ daloki ad «šachmatnaj palityki».
Biełarusam taksama varta paradavacca pieramozie baŭharyna: choć jon ciapieraka žyvie ŭ Hišpanii, ale ž pachodzić ź niebahataj «niašachmatnaj» krainy centralnaeŭrapiejskaha rehijonu. To, moža, i ŭ nas kali-niebudź svoj Tapałaŭ źjavicca.
Kamientary