Carskaje siało Drazdy: chto ŭ im žyvie

Pobač z rezidencyjaj «Drazdy» Alaksandra Łukašenki, na bierazie Śvisłačy na paŭnočnym zachadzie Minska, za apošnija 10 hadoŭ vyras utulny katedžavy pasiołak. Na niekalkich kvadratnych kiłamietrach tut možna sustreć ciapierašniaha i byłych premjeraŭ, staršyń pałataŭ, ministraŭ, biznesmenaŭ, chakieistaŭ dy inšych niaprostych biełarusaŭ.

Historyja hetaha kłubnaha pasiołka pačałasia ŭ siaredzinie 2000-ch, kali mnohim čynoŭnikam nadyšła prapanova pabudavać na vyhadnych umovach katedž niepadaloku ad rezidencyi Alaksandra Łukašenki.

Košt budaŭnictva byŭ paraŭnalna nievysokim, da taho ž, možna było ŭziać kredyt. Inflacyja, dźvie devalvacyi — usio heta źmienšyła faktyčnuju kančatkovuju canu.

Jak stać miljanieram

U Rasii viadomaść atrymaŭ dačny kaapieratyŭ «Voziera». Jon byŭ stvorany ŭ 1996 hodzie z udziełam Uładzimira Pucina, tady čynoŭnika ŭ pieciarburhskaj meryi. Ź ciaham času jon staŭ kiraŭnikom dziaržavy, a jahonyja «aziornyja» kampańjony — ministrami ci biznesoŭcami-miljarderami.

Biełarusy z Drazdoŭ da miljarderaŭ jašče nie daraśli, ale dalaravymi miljanierami ich robiać sami hetyja damy.

Katedžy na hetych vulicach pradajucca ad $1,5 miljona z hołymi ścienami da $2,5 miljona z poŭnym azdableńniem. Stolki kaštuje šaniec stać susiedam Uładzimira Kanaplova ci Juryja Čyža.

Navat pry źmienie ŭłady ci ŭ vypadku raptoŭnaj adstaŭki žychary Drazdoŭ zmohuć zabiaśpiečyć nie tolki svaich dziaciej, ale i ŭnukaŭ, i praŭnukaŭ, prosta pradaŭšy dom. Nie dziva, što navat adstaŭniki nakštałt byłoha ministra ŭnutranych spraŭ Uładzimira Navumava ci byłoha kiraŭnika Administracyi prezidenta Urała Łatypava nie śpiašajucca zbyvać elitnuju nieruchomaść, choć daŭno pierabralisia ŭ Maskvu.

Miesca dla vybranych

Usia terytoryja Drazdoŭ užo zabudavana, bolš razrastacca niama kudy. U ich pad 150 katedžaŭ.

Załatyja kvartały pačynajucca adrazu za Śviatapakroŭskaj carkvoj na praśpiekcie Pieramožcaŭ. U jaje honar hałoŭnaja vulica Drazdoŭ nazyvajecca Pakroŭskaj. Jašče niadaŭna na kartach jana była padpisana jak Srebnaje kalco. Susiednija zavułki majuć adpaviednyja nazvy — Ahatavy, Izumrudny, Załaty… U dadatak da apošniaha jość jašče i Załataja vulica.

«Miesca dla vybranych» — tak nazyvajuć hety rajon u bukletach ryełtaraŭ.

Naŭprost pasiarod vulicy tut moža stajać milicejski post, a na skryžavańniach advolna raskidanyja darožnyja znaki «Ujezd zabaronieny», jakija nie dazvalajuć zajazdžać siudy nikomu, aproč haspadaroŭ. Vypadkovych ludziej tut nie čakajuć.

Roznyja ŭzroŭni sakretnaści?

Infarmacyja pra toje, chto žyvie na zavułkach Ahatavym i Izumrudnym, a taksama vulicy Račnoj, jość, jak akazałasia, u adkrytym dostupie.

Žychary susiednich Aziornaha i Pakroŭskaha zavułkaŭ znachodziacca — vypadkova ci nie — na inšym uzroŭni sakretnaści. Źviestak pra toje, kamu naležyć toj ci inšy katedž u tych zavułkach, niama. Ale viadoma, što akurat tam mieścicca dom, naprykład, byłoha staršyni pałaty pradstaŭnikoŭ Uładzimira Kanaplova, jaki ciapier uznačalvaje Fiederacyju handboła Biełarusi. Niepadaloku pražyvajuć i inšyja ŭpłyvovyja ludzi — Lidzija Jarmošyna, Uładzimir Makiej, Natalla Piatkievič.

Kab nie parušać tajamnicy pryvatnaha žyćcia, my nie nazyvajem kankretnych adrasoŭ ułaśnikaŭ katedžaŭ.

Zrešty, my sami ździvilisia, što infarmacyja pra toje, kamu naležyć jaki budynak, jość u adkrytym dostupie.

Ahatavy zavułak

Pryncyp, pa jakim raźmiarkoŭvalisia ŭčastki dla zabudovy, zrazumieć składana. Ci čynoŭniki sami vybirali, kamu dzie žyć, ci kidali žerabia.

Naprykład, u Ahatavym zavułku ź viadomych ludziej zbudavaŭsia ciapierašni kiraŭnik Administracyi prezidenta, a da taho — vice-premjer i pasoł u Rasii Andrej Kabiakoŭ. Padčas budaŭnictva Drazdoŭ jon siadzieŭ akurat va ŭradavym kreśle.

Jahony susied — były namieśnik kiraŭnika Administracyi prezidenta Alaksandr Papkoŭ. Ciapier jon siadzić u pałacie pradstaŭnikoŭ užo druhi termin.

Pabudavany ŭ kłasičnym styli dom z asobnym haražom naležyć biznesmenu Viktaru Šaŭcovu, jaki niadaŭna byŭ amnistavany Alaksandram Łukašenkam. «Trastbank» i «Biełzamiežbud», jakija kantralavaŭ Šaŭcoŭ, — heta šmatmiljonny biznes.

Ścipły dom pa susiedstvie pabudavaŭ niaźmienny staršynia Vyšejšaha haspadarčaha suda Viktar Kamiankoŭ. Jon pry pasadzie ŭžo dvanaccaty hod — redkaje doŭhažycharstva dla łukašenkaŭskich čynoŭnikaŭ.

Były staršynia KDB Leanid Jeryn i były ministr unutranych spraŭ Uładzimir Navumaŭ u svaich katedžach źjaŭlajucca zredku. Siłaviki, jakija stracili pasady, ciapier źviazali svajo žyćcio z Rasijaj.

Doŭha nie było doma i kiraŭnika pahraničnych vojskaŭ Alaksandra Paŭłoŭskaha. Apošnija piać hadoŭ jon prabyŭ pasłom u Francyi. Paśla pryznačeńnia na hetuju pasadu Paŭła Łatuški Paŭłoŭski zastaŭsia biez pracy.

Izumrudny zavułak

Jak i Ahatavy, hety zavułak tupikovy. Zajezd u jaho adkryty z vulicy Pakroŭskaj.

Pa kožnym z bakoŭ zavułka znachodziacca pa piać katedžaŭ, daroha mima jakich zakančvajecca kołam i stajankaj dla aŭtamabilaŭ haściej. Dla mašyn haspadaroŭ u damach praduhledžanyja ciopłyja haražy.

Siarod samych upłyvovych žycharoŭ tut premjer-ministr Michaił Miaśnikovič.

Katedž jon budavaŭ jašče ŭ statusie staršyni Prezidyuma Akademii navuk. Pobač ź im žyvuć były śpikier pałaty pradstaŭnikoŭ Vadzim Papoŭ i hałoŭny mytnik Alaksandr Špileŭski.

U hetym ža tupiku stajać katedžy bankirki Nadziei Jermakovaj, jakoj nie treba dźvie pary impartnych tuflaŭ, i adstaŭnoha staršyni Kanstytucyjnaha suda i prakurora Ryhora Vasileviča.

Tut žyvie i Valeryj Mazoŭka. Mienavita jahony trest «Prambud» uzvodziŭ katedžy ŭ Drazdach.

Ambasadar Uładzimir Dražyn žyvie pamiž Biełaruśsiu i Litvoj užo siomy hod. Dom u Drazdach jon zajmieŭ u jakaści vice-premjera.

Uładzimir Siamaška zastajecca na miescy pieršaha vice-premjera ŭžo dziasiaty hod, kudy pryjšoŭ z pasady ministra enierhietyki. Jahony były pieršy namieśnik, enierhietyk Eduard Taŭpianiec, žyvie niepadaloku. U ministry jon tak i nie prabiŭsia.

Apošni dom na Izumrudnym naležyć Hienadziu Kuračkinu. Jon byŭ ministram architektury i budaŭnictva ŭ 1999—2006 hadach, paśla čaho Łukašenka zajaviŭ, što Kuračkina daŭno treba było pasadzić.

Vulica Račnaja

Va ŭschodniaj častcy vulicy Račnoj možna sustreć ludziej trochi ź inšych słajoŭ hramadstva.

Tut u pačatku vulicy znachodzicca katedž uładalnika hipiermarkietaŭ «Karona» i kampanii «Tytuń-Inviest» hreka Paŭła Tapuzidzisa. Ciapier jon ablubavaŭ uźbiarežža Zasłaŭskaha vadaschovišča pad Ratamkaj, dzie maje viertalotny kłub, a ŭ drazdoŭskim domie idzie ramont.

Zusim blizka ad jaho žyvuć ułaśnik samaj vialikaj biznes-impieryi Biełarusi Juryj Čyž i trenier chakiejnaha «Junactva» Michaił Zacharaŭ. Na dniach maładaja žonka treniera vykłała ŭ sacyjalnuju sietku svaje zdymki na fonie doma i šykoŭnaha «Bentli». Paśla taho jak fota pierastavili mnohija sajty, Maryna Jermałovič-Zacharava paličyła za lepšaje zusim vydalicca ź sietki.

Na terytoryi ŭčastka kiraŭnika ANT Ryhora Kisiala adrazu dva vialikija zbudavańni — sam dom i haraž. Pobač ź im žyvie adzin ź pieršych paplečnikaŭ Łukašenki, novy kiraŭnik spravaŭ prezidenta Viktar Šejman. Cikava, što karespandentaŭ «NN» abbrachali sabaki tolki kala jaho doma.

Kala Šejmana abasnavalisia daŭni vice-premjer Anatol Tozik, novapryznačany vice-premjer (a ŭ časie pabudovy — kiraŭnik Nacyjanalnaha banka) Piatro Prakapovič i były premjer-ministr Siarhiej Sidorski.

Vulica Račnaja bahataja na premjeraŭ. Svoj dom tut maje i Hienadź Navicki, jaki paśla niadoŭhaha kiravańnia ŭradam pierasieŭ u bieskłapotnaje kresła ŭ saviecie respubliki.

I ajciec Fiodar

Dvoje miascovych siłavikoŭ, jakija adyšli ad spravaŭ, — Hienadź Niavyhłas i Urał Łatypaŭ. Apošni ŭžo daŭno asieŭ u Maskvie.

Katedž pabudavaŭ i niepubličny Mikałaj Korbut, jaki niadaŭna sastupiŭ pasadu kiraŭnika spravaŭ prezidenta Šejmanu.

Z małaznajomych ludziej varta ŭzhadać siamju rasijskaha miljardera Uładzimira Hruździeva. Jon źjaŭlajecca akcyjanieram rasijskaj sietki kramaŭ «Siomy kantynient», a raniej kantralavaŭ bujny pakiet akcyj kramaŭ «Prastor», paśla pradadzieny Juryju Čyžu. Ciapier Hruździeŭ źjaŭlajecca hubiernataram Tulskaj vobłaści. Domam vałodaje jahonaja maci Neli.

A katedž ajca Fiodara Poŭnaha — nastajaciela Usichśviackaha prychoda i apiekuna minskaha Doma miłasernaści — składana pierabłytać z susiednimi. Fasad jahonaha doma ŭpryhožvaje kruhłaja ikona.

Jeŭropa pa-saviecku

U savieckija časy namienkłatura atrymlivała biez čarhi trochi bolšyja kvatery. Ciapier heta vialikija damy.

U savieckija časy čynoŭniki žyli ŭpieramiežku ź dziejačami kultury i navuki. Ciapier — amal vyklučna ź biznesoŭcami i spartoŭcami.

Kali paraŭnać z ładam žyćcia top-čynoŭnikaŭ i biznesoŭcaŭ Rasii ci Ukrainy, biełaruskija čynoŭniki i haspadarniki žyvuć našmat ściplej. I pamiery damoŭ mienšyja, i nie afišujuć jany svajoj zamožnaści. Taho patrabujuć normy etyki, jakija nie raz publična ahučvaŭ Łukašenka: «nie vystaŭlać bahaćcia napakaz». Ale ž damy ŭ Drazdach darahija: ź niatannych materyjałaŭ, ź niemałymi pa haradskich mierkach učastkami. I hałoŭnaje — u supierdarahim miescy, kala praśpiekta Pieramožcaŭ.

Ale ŭ paraŭnańni sa Šviecyjaj, Čechijaj ci Litvoj vyhladaje takoje Carskaje siało dziŭnavata.

Pa-pieršaje, tam nie pryniata, kab ułada naležała niejkaj kaście, jakaja navat žyvie ŭ asobnych pasiołkach. Pa-druhoje, sam praces adnačasovaha budaŭnictva čynoŭnikami i biznesmenami katedžaŭ u adnym pasiołku staŭ by abjektam hramadskaj uvahi.

Pasiołak Drazdy možna z poŭnym pravam nazvać Carskim siałom. I pa bahaćci, i pa sposabie jaho stvareńnia. Faktyčna, jaho žychary atrymali svaje damy ad «cara». Alaksandr Łukašenka stvaryŭ, źlapiŭ hetuju elitu, złučyŭšy razam čynoŭnikaŭ i biznesoŭcaŭ. I pasialiŭ pobač z saboj.

***

Žychary troch vulic, sacyjałahičny zrez (uličany tolki tyja proźviščy, što na słychu)

Cyvilnyja čynoŭniki — 15

Siłaviki — 9 

Biznesoŭcy — 4

Televizijščyk — 1

Spartsmien — 1

Śviatar — 1

Dziejačaŭ kultury — 0

***

Pavialičyć

Trapić u hości da Juryja Čyža ci Paŭła Tapuzidzisa składana, ale možna daviedacca, jak vyhladajuć ścipłyja damy na susiednich vulicach.Na fota adzin ź ich, na Pakroŭskim zavułku, jaki vystaŭleny na prodaž na sajcie realt.by za $2,5 miljona, z učastkam na 11,75 sotki. Farmalna katedž dvuchpaviarchovy, ale ŭ realnaści maje čatyry ŭzroŭni. Projdziemsia pa ich.

Na cokalnym paviersie znachodzicca zona rełaksacyi: fitnes-zała (33,5 m2), kaminnaja zała (37 m2), finskaja saŭna, pakoj dla adpačynku, a taksama sanvuzieł, kacielnia, dźvie kładoŭki, harderob i choł na 18,6 m2.

Uzdymajemsia vyšej. Tut jość haścinaja (70 m2), jakaja ŭtvaraje adzinuju prastoru z kuchniaj-stałovaj (jašče 13,6 m2). Śviežuju presu možna pačytać na terasie (29 m2). Z choła jość uvachod i ŭ vialiki haraž na dźvie mašyny. Adzin žyły pakoj zajmaje 33,1 m2.

Druhi pavierch zaniaty spalniami, ich try, pryčym kožnaja z ułasnaj harderobnaj. Pamiž imi choł (30 m2) i kabiniet (14,7 m2). Narešcie, jość i dva sanvuzły (ahułam — 23,8 m2).

Na mansardzie možna znajści choł (32,6 m2), kładoŭku i chatni kinateatr (23 m2).

I paru słovaŭ pra ŭnutranaje azdableńnie. Padłoha na pieršym paviersie i va ŭsich sanvuzłach z padahrevam, leśvica zroblenaja z naturalnaha dreva z prystupkami ź niamieckaj plitki. Na ścienach — bielhijskija i niamieckija špalery.

Ci takija ž damy ŭ biełaruskaj elity? Časam navat lepšyja. U apisanaj vyšej chatcy, naprykład, niama basiejna. A voś niekatoryja vysokija čynoŭniki ad takoha bonusa nie admaŭlajucca.

***

Nie Drazdami adzinymi

Adkul čynoŭniki pierajechali ŭ Drazdy?

Siamja Viktara Šejmana raniej žyła ŭ novym domie na vulicy Azhura, ciapier tam haspadaryć syn Siarhiej.

Kiraŭnik ANT Ryhor Kisiel raniej žyŭ u Zialonym Łuzie.

A Lidzija Jarmošyna dahetul maje ścipłuju kvateru na ŭskrajku minskaha spalnaha rajona Masiukoŭščyna.

Siamiejstva pravasłaŭnych śviataroŭ Poŭnych ablubavała dom na Staražoŭskaj z malaŭničym vidam na Śvisłač. U adnoj z kvater žyvie protaijerej Hienadź (brat ajca Fiodara), a ŭ susiedniaj — Hanna Fiodaraŭna Poŭnaja.

Cikava, što jašče niekalki hadoŭ tamu ŭ protaijereja Fiodara Poŭnaha była jašče adna kvatera ŭ domie na Staražoŭcy. Ciapier jaje pierakupili inšyja ludzi. Novaja ŭłaśnica — Hanna Uładzimiraŭna Piefcijeva. Uładzimir Piefcijeŭ, nahadajem, byŭ ułaśnikam kampanii «Biełtechekspart» dy inšych sumiežnych biznesaŭ.

***

Kolki zarablaje absłuha ŭ Drazdach?

Minskija ahienctvy zaniataści časam vyviešvajuć abjavy ab pošuku niańki ŭ niejki z katedžaŭ ŭ Drazdach. Što ŭvachodzić u abaviazki najmanaha rabotnika i kolki za heta płaciać?

Voś adna z abjavaŭ: «Siamja zaprašaje na pracu ŭ Drazdy niańku dla dziaŭčynki 7,5 hoda. Hrafik pracy — paniadziełak-subota, pracoŭny dzień z 11.00 da 19.00. U abaviazki ŭvachodzić pryhatavańnie ježy dla dziciaci (abied i viačera) i karmleńnie, vyhuł sabak, dohlad za dziciačym harderobam. Časam treba dapamahać domrabotnicy pa haspadarcy i nabyvać pradukty razam z kiroŭcam».

Vystaŭlenaja apłata składaje $5 za hadzinu. Za miesiac takoj pracy niańka možna zarabić kala $1000.

Jak vynikaje z abjavy, u domie pracujuć chatniaja rabotnica, kiroŭca, niańka i repietytar. Heta standart žyćcia navat nie siaredniestatystyčnaha jeŭrapiejca, a samych zamožnych siemjaŭ.

• 1
• 0
• 0
• 0
• 1
• 0
• 2
• 0