Para dumak pra toje, ci varta iści na taki Dzień Voli

Ja adchadziŭ na mnohija šeści. Samaje pamiatnaje dla mianie — biezumoŭna, 1996 hoda. Tady taksama Dzień Voli adbyŭsia 24 sakavika.

24 sakavika 1996-ha šeście nie było dazvolena, ale ludzi ŭsio adno źbiralisia da płoščy Niezaležnaści. Milicyja jaje ačapiła. Strumieńčyki ludziej ściakalisia da paštamta, ludskoje voziera nabrynała, nabrynała, i rakoju prarvałasia na hałoŭny praśpiekt. U mianie, maładoha, było ŭražańnie, što ceły horad vyjšaŭ. Viadoma, nie ceły horad. Ale 20–30 tysiač ludziej było, i heta dało šturšok Minskaj viaśnie — 1996, kali naša hramadzianskaja supolnaść upieršyniu zmusiła z saboj ličycca.

Pomnicca i Dzień Voli 2000 hoda, užo na płoščy Jakuba Kołasa, kali ŭłady zatrymali bolš za 400 čałaviek, kab źbić pratestavyja nastroi — pieršy taki vialiki previentyŭny chapun.

Byli i Dni Voli, kali nie znachodziłasia nikoha, chto b uziaŭsia za arhanizacyju šeścia — takija hady depresii byvali. 2003, 2004-y… Heta ŭžo cełaja historyja ŭzdymaŭ i spadaŭ.

Sioleta ŭłady dazvolili Dzień Voli tolki ŭ Minsku, u rehijonach — nie. Minsk staŭ fasadam psieŭdademakratyi. Ale heta adnačasova i reakcyja na toj fakt, što ŭ Minsku jość krytyčnaja masa zdolnych vyjści na vulicu, niahledziačy navat na zabaronu. A heta łukašenkaŭcam strašniej za ŭsio: kali ludzi demanstrujuć, što jany parušajuć praviły hetaj sistemy, što robić uładu adnoj siamji viečnaj.

Vuličnyja akcyi — samaje niepryjemnaje dla hetaj sistemy. Bo takaja ŭłada moža źmianicca tolki ŭ vyniku taho, što masavy vychad ludziej na vulicy tym samym ludziam pakazvaje, što karol ža hoły, što bolšaść suprać jaho. Inšaha sposabu pakazać heta nie isnuje. I inšaha sposabu dabicca pieramien niama.

Paźniak z hetym nibyta zhadžajecca, ale abstaŭlaje roznymi «ale». Maŭlaŭ, nielha vychodzić na akcyi nie ŭ centry, nielha pravodzić akcyi palityčnym chaŭrusam, treba, kab tolki pravilnyja siły arhanizoŭvali. Narešcie, samy kryvadušny arhumient paźniakoŭcaŭ: što «nielha zaśviečvać ludziej». A na Dziady, značyć, možna zaśviečvać, tolki tamu što heta ładzić KCHP, a nie kaalicyja?.. Kryvadušniki…

Ja zaśviečvajusia, ja demanstruju: ja suprać vas, i ja budu suprać vas, suprać Zła, heta moj śviadomy vybar.

U vyniku što ŭ KCHP vychodzić — para dziasiatkaŭ ich prychilnikaŭ niabačna dla hramadstva ŭskładaje kvietki. Heta nie robić pazityŭnaha ŭpłyvu na ludziej. Naadvarot, takimi dziejańniami paźniakoŭcy pakazvajuć svaju słabaść i pracujuć na raskoł apazicyi.

Šeści — heta kropli, jakija točać kamień.

Tak, apazicyi ŭ aŭtarytarnym hramadstvie davodzicca dziejničać pa praviłach dyktatury — častkova ci dla formy. Tak, arhanizatary nie majuć mahčymaści zdabyć hukaŭzmacnialnuju aparaturu, pranieści transparanty ci ściahi. (A ahienty Zła spačatku sa skury vyłuzvajucca, kab tyja ściahi i ŭzmacnialniki adniać, a paśla čaplajuć inšyja maski i bjuć na raskoł: maŭlaŭ, voś jakija słabyja lidary, što nie mohuć huku zabiaśpiečyć.) Ale časam adnaho ściaha byvaje dosyć.

Dziakujučy hetaj dziejnaści kaliści adbudziecca toje, što adbyłosia 24 sakavika 1996 hoda — strumieńčyki źlijucca ŭ vialikuju raku, i hetaja raka prarvie płaciny,

Pakul dla dasiahnieńnia hetaha jość šeści, ja budu na ich chadzić. Bo heta najbolšaje, što ja mahu zrabić jak hramadzianin i biełarus.

• 0
• 0
• 0
• 0
• 0
• 0
• 0
• 0