Svoj parłamient, talery i dziaržaŭnaja biełaruskaja mova: u žniŭni projdzie moładzievy adukacyjny fest «Respublika Mary»

Na chutary «Šabli» pad Vałožynam 21—24 žniŭnia projdzie moładzievy fiestyval-letnik «Remara». Choć słova «letnik» nie vielmi padychodzić da hetaj padziei.

Arhanizatary «Remary» abiacajuć cełuju mini-krainu — Respubliku Mary.

Adzin sa stvaralnikaŭ «Remary» Jaŭhien Michasiuk raskazaŭ «NN», što heta pieršy padobny prajekt na terytoryi Biełarusi.

«Ideja pryjšła da nas z Ukrainy. Tam mierapryjemstva nazyvajecca StudRespublika. My ŭziali ich ideju za asnovu, ale ŭ dalejšym značna źmianili jaje i na vychadzie majem unikalny farmat i fiestyval. Takoha ŭ našaj krainie jašče nie pravodzili», — kaža jon.

Što takoje «Remara»? Heta čatyrochdzionaja rolevaja adukacyjna-zabaŭlalnaja hulnia z «poŭnym pahružeńniem». A hulać udzielniki buduć u krainu.

U «Remary» budzie svaja palityčnaja sistema z zakonami, vybarnym parłamientam, biržaj pracy, milicyjaj, padatkovaj słužbaj i MZS. Budzie i asobnaja ekanamičnaja sistema z ułasnymi hrošavymi adzinkami — talerami.

Kožny ŭdzielnik musić zarablać talery, bo bieź ich nie zmoža kupić ježu, apłacić žytło i spłacić padatki, prajści na kancert.

Čynoŭniki «Remary» buduć atrymlivać hrošy ad dziaržavy, ale ŭpor budzie zrobleny na pryvatny biznes.

Praduhledžana navat dapamoha biespracoŭnym.

«Adnak kali nie adpracavać, nastupnym razam dapamohu nie daduć», — zasiarodžvaje ŭvahu Michasiuk.

Michasiuk kaža, što hałoŭnaj metaj «Remary» jość pryciahnieńnie ŭvahi moładzi da važnych sacyjalnych prablem u biełaruskim hramadstvie. Tamu ŭsie žychary buduć abaviazanyja dbać ab raźvićci svajoj krainy i płanavać jaje budučyniu.

Dziaržaŭnaj movaj u «Remary» budzie biełaruskaja. Heta značyć, što ŭsie dziaržaŭnyja pastanovy i inšyja dakumienty buduć vyklučna pa-biełarusku.

Udzielnikaŭ «Remary» taksama čakaje nasyčanaja adukacyjnaja častka. Ź lekcyjami vystupiać Aleś Łahviniec, Siarhiej Čały, Alaksiej Łastoŭski, Andrej Łaŭruchin, Ivan Viadzienin. Zaniatki zakranuć prablemy bilinhvizmu, studenckaha samakiravańnia, rynačnaj ekanomiki, roli partyj ŭ dziaržavie i inšyja.

Budzie čym zaniacca i volny ad zaniatkaŭ čas. U letniku buduć hulać u valejboł, futboł, nastolnyja hulni. Taksmama abiacajuć pakazvać kino pa-biełarusku. «Pa sutnaści, my stvorym pieršy ŭ krainie biełaruskamoŭny kinateatr», — kaža Jaŭhien Michasiuk.

Budzie na fiestyvali i muzyka. Dla remarcaŭ vystupiać Askiepak, Siarhieja Bašłykieviča, Haina, Amaroka, Ludzi na bałocie i Dzieciuki.

Znachodžańnie ŭ «Remary» ciaham čatyroch dzion budzie kaštavać 250 tysiačaŭ rubloŭ.

Da ŭdziełu zaprašajucca maładyja ludzi va ŭzroście ad 18 da 31 hoda. Kab uziać udzieł, treba zarehistravacca i zapoŭnić admysłovuju ankietu. Pakul na sajcie «Remary» kolkaść miescaŭ abmiežavanaja ličbaj — 150 čałaviek. Adnak Michasiuk zapeŭniŭ, što ŭ «Remaru» pastarajucca ŭziać usich achvotnych i pry vialikim patoku zajavak pavialičyć kolkaść miescaŭ.

• 0
• 0
• 0
• 0
• 0
• 0
• 0
• 0