Centrvybarkam apublikavaŭ śpisy inicyjatyŭnych hrup kandydataŭ u prezidenty Biełarusi. Heta pieralik tych ludziej, jakija na praciahu miesiaca buduć stajać u pikietach i chadzić pa kvaterach, kab sabrać nieabchodnyja 100 tysiač podpisaŭ.
Fota Siarhieja Hudzilina.
Siarod aktyvistaŭ mała viadomych asobaŭ, adnak navat suchija ličby dajuć vydatnuju karcinu biełaruskaha palityčnaha žyćcia.
U inicyjatyŭnaj hrupie Alaksandra Łukašenki 10 430 čałaviek. Jak jany nabiralisia — nieviadoma, bo abviestki ab pošuku aktyvistaŭ nie publikavalisia ŭ adkrytym dostupie. Tajamnica raskryvajecca pry analizie hiendarnaj prynaležnaści siabroŭ inicyjatyŭnaj hrupy.
Siarod «prychilnikaŭ» Łukašenki 8673 žančyny i 1757 mužčyn. Praporcyja składaje 83:17. U 2010 hodzie nazirałasia padobnaja situacyja, 81:19. Heta niejmaviernyja ličby! Jany dapuščalnyja tolki ŭ vypadku, kali kandydat maje jarkuju hiendarnuju prahramu, naprykład, pradstaŭlaje žanočuju partyju.
Zrešty, raŭniutka takaja praporcyja mužčyn i žančyn sustrakajecca ŭ zborniku Biełstata, pryśviečanamu adukacyi. Siarod nastaŭnikaŭ u biełaruskich siarednich škołach pracuje 83% žančyn i 17% mužčyn. Supadzieńnie?
U cełym mužčyny ŭ siłu tych ci inšych abstavinaŭ prajaŭlajuć bolšuju palityčnuju aktyŭnaść za žančyn. Takaja tendencyja nazirajecca badaj va ŭsich krainach śvietu. Rada Jeŭropy dekłaruje ŭ jakaści adnoj z metaŭ daviadzieńnie doli žančyn va ŭładzie da 40%.
Čym vyšejšy ŭzrovień ułady, tym dola žančyn stanovicca mienšaj. Naprykład, siarod deputataŭ biełaruskich miascovych savietaŭ letaś było abrana 46% žančyn. U pałacie pradstaŭnikoŭ hety pakazčyk źnižajecca da 26%, žančyn-ministraŭ — dźvie.
Fakt u tym, što ni na adnoj prystupcy palityčnaj aktyŭnaści žančyn nie byvaje bolš za mužčyn. Analiz śpisaŭ inicyjatyŭnych hrup kandydataŭ u prezidenty paćviardžaje hetuju dumku.
Naprykład, siarod zborščykaŭ Anatola Labiedźki 62% mužčyn, u Siarhieja Hajdukieviča — 60%. U Siarhieja Kalakina i Taćciany Karatkievič — pa 57%. Kandydat Žanna Ramanoŭskaja ź niereprezientatyŭnaj małoj inicyjatyŭnaj hrupaj maje ŭ śpisie 53% mužčyn. U Viktara Ciareščanki — 50,4%.
Padobnaja karcina nazirałasia i ŭ 2010 hodzie. Naprykład, u inicyjatyŭnaj hrupie Mikoły Statkieviča było 62% mužčyn, u Andreja Sańnikava — 64%. Niekatoryja kandydaty nachodzilisia krychu dalej ad siaredniaj vieličyni (u Hajdukieviča tady było 52% mužčyn, u Ciareščanki — 70%), adnak ni ŭ koha z pretendentaŭ žančyny ŭ śpisach nie pieravažali.
To bok usie apanienty ŭłady (tyja, chto chacia b zaklikajuć hałasavać za siabie, a nie za Łukašenku), majuć siarod svaich aktyvistaŭ 55—60% mužčyn.
A što ž Mikałaj Ułachovič, pra nabor u inicyjatyŭnuju hrupu jakoha nie było viadoma da apošniaj chviliny padačy dakumientaŭ u CVK? Jahonaje «Biełaruskaje kazactva» — uščent mužčynskaja arhanizacyja, adnak u inicyjatyŭnaj hrupie lidara tolki 29% mužčyn. Hetaja ličba kudy bližej da pakazčykaŭ Łukašenki.
* * *
Dola mužčyn i žančyn u inicyjatyŭnych hrupach
| № | Kandydat | Hrupa | Dola mužčyn | Dola žančyn |
| 1 | Alaksandr Łukašenka | 10577 | 17% | 83% |
| 2 | Siarhiej Hajdukievič | 2481 | 60% | 40% |
| 3 | Taćciana Karatkievič | 1993 | 57% | 43% |
| 4 | Siarhiej Kalakin | 1510 | 57% | 43% |
| 5 | Mikałaj Ułachovič | 1426 | 29% | 71% |
| 6 | Anatol Labiedźka | 977 | 62% | 38% |
| 7 | Viktar Ciareščanka | 946 | 50,4% | 49,6% |
| 8 | Žanna Ramanoŭskaja | 110 | 53% | 47% |
Kamientary