Nie takija strašnyja «hrabary» jak ich malujuć. BATE — «Partyzan» 1:0
Barysaŭski BATE pravioŭ pieršy matč raŭnda płej-of Lihi čempijonaŭ suprać sierbskaha «Partyzana». Na konu vialiki kuš: pieramožca pary vychodzić u hrupavy etap Lihi čempijonaŭ, a taksama atrymlivaje salidnaje hrašovaje ŭznaharodžańnie.
Uvohule, da hetaha hoda BATE čatyry razy hulaŭ u raŭndzie płej-of i kožny raz zdabyvaŭ pieramohu. Pa čarzie byli abyhranyja «Leŭski», «Šturm», «Makabi» i «Słovan».
Sierbski «Partyzan» — heta hučnaja šylda. Ale za apošnija hady ad sierbskaha futboła ŭ hulniavym płanie zastałosia niamnoha. Sierbija, naprykład, u zvodnaj tablicy kaeficyjentaŭ UEFA znachodzicca našmat nižej za Biełaruś.
Što dobraha jość u «Partyzana», dyk heta fanackaja padtrymka. Fanaty kamandy nazyvajucca «Hrabary», heta značyć «mahilščyki», «dałakopy». U Biełaruś pryjechała niekalki socień sierbaŭ, a jašče z Maskvy padtrymać siabroŭ adpravilisia fany CSKA. Mahčyma, mienavita z hetym źviazana pravierka pašpartoŭ u zaŭziataraŭ pierad hulnioj, kab na trybuny nie trapili najbolš radykalnyja ultras CSKA i «Partyzana».
Uvohule, fanam «Partyzana» varta vykazać reśpiekt, zaŭzieli jany za svaju kamandu hučna i samaaddana. Ciažka ŭjavić, što budzie praz tydzień u Białhradzie. Barysaŭcy staralisia nie adstavać.
Što tyčycca hulniavych momantaŭ, tut kamplimientaŭ na adras «Partyzana» vykazać možna značna mieniej. Abodva momanty la našych varot uźnikali nie paśla techničnych kambinacyj ataki, a paśla abrezak barysaŭskaj abarony. Na ščaście, kožny raz pieramožcam vychodziŭ bramnik Siarhiej Černik.
Istotnym faktaram, jaki paŭpłyvaŭ na chadu hulni, stała vydaleńnie paŭabaroncy Marka Jeŭtaviča pry kancy pieršaha tajma. Spačatku Jeŭtavič adšturchnuŭ Alaksandra Hleba, a paśla ŭ barcoŭskim styli pryniaŭ Vitala Radzivonava. Šatłandski refiery Tomsan nie vahaŭsia z pakarańniem.
BATE vyjšaŭ na matč zaradžany na vynik. Asabliva heta adčuvałasia ŭ dziejańniach Vitala Radzivonava. Naš napadajučy hareŭ žadańniem narešcie zabić svoj pieršy miač u hetym rozyhryšy Lihi čempijonaŭ. Radzivonaŭ dvojčy dobra biŭ hałavoj, ale pierajhrać bramnika Žyŭka Žyŭkaviča nie ŭdavałasia.
Było ŭražańnie, što za pieršyja 20 chvilin hulni BATE stvaryŭ momantaŭ nie mienš, čym za cełuju hulniu ź minskim «Dynama» tydniovaj daŭniny.
U druhim tajmie BATE całkam daminavaŭ na poli. Byli adrezki, kali barysaŭcy nie dapuskali supiernika na svaju pałovu pola na praciahu piaci i bolš chvilin. Trenier Alaksandr Jermakovič ryzyknuŭ, vypuściŭšy ŭ hulniu druhoha napadajučaha Mikałaja Sihnieviča zamiest apornika Jaŭhiena Jabłonskaha.
Hoł byŭ zabity na 75-j chvilinie z kutniaha. Halavuju pieradaču addaŭ Ihar Stasievič, jaki tolki zalačyŭ traŭmu, a adznačyŭsia Michaił Hardziajčuk. Pryčym zabiŭ biełarus u nietradycyjnaj dla siabie maniery — hałavoj. Sierby pakinuli Hardziejčuka absalutna adnaho, šancaŭ nie było — 1:0.
U kancy hulni «Partyzan» dziakujučy davoli sprečnym štrafnym, jakija hulcy litaralna vyprošvali ŭ arbitra, stvaryŭ peŭnuju niebiaśpieku i tryvohu, ale na vynikovy lik heta ŭsio ž nie paŭpłyvała. BATE atrymlivaje pieramohu ź lubimym dla siabie sioleta likam 1:0.
Hulnia ŭ adkaz adbudziecca ŭ Białhradzie 26 žniŭnia.
Ciapier čytajuć
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ38
Kamientary