Polski videabłohier Michał Sikorski źniaŭ repartaž pra svajo padarožža pa Biełarusi. Rolik Białoruś — jak tam jest naprawdę? (Biełaruś — jak tam nasamreč?) usiaho za niekalki dzion nabraŭ bolš za 90 tysiač prahladaŭ.
Michał vyrašyŭ prajechacca pa Biełarusi i daviedacca, u čym ža adroźnieńni pamiž blizkimi pa kryvi narodami.
Jaho padarožža pačałosia z naviedvańnia Hrodna, dzie Michału spadabałasia niekranutaja vajnoj architektura, cudoŭnyja kaścioły, čyścinia vulic i pryhožyja dziaŭčaty.
Paśla Hrodna jaho čakaŭ Navahradak, dzie Michał paznajomiŭsia z muziejem paeta Adama Mickieviča. Paźniej jon adpraviŭsia ŭ viosku Vialičkava pad Babrujskam, dzie žyli jaho prodki, arystakraty, asiełyja ŭ tych miescach padčas šviedskich vojnaŭ. Adtul ža rodam jaho dzied Fieliks Sikorski.
Nastupnym punktam pryznačeńnia byŭ Minsk. «U paraŭnańni z Varšavaj, Minsk maje asablivuju atmaśfieru, jakaja nie nahadvaje kamiennyja džunhli, ale ŭ toj ža čas heta horad, u jakim jość dynamika i žyćcio», — ličyć Michał.
U cełym Biełaruś pakinuła ŭražańnie zabiaśpiečanaj i biaśpiečnaj krainy, dzie dobryja darohi, čystyja vulicy, ceny na bienzin, cyharety i niekatoryja pradukty nižejšyja, čym u Polščy.
Zasmuciła vandroŭcu vysokaja płata za biełaruskuju vizu — 300 złotych.
Michał Sikorski ŭpeŭnieny, što Biełaruś pavinna być siabram i sajuźnikam Polščy, tamu što dva narody vielmi ciesna źviazanyja pamiž saboj histaryčnymi i kulturnymi suviaziami. Adnak Michał ćviaroza aceńvaje biahučuju situacyju i razumieje, što ŭ bližejšy čas adnosiny pamiž našymi krainami naŭrad ci źviedajuć pazityŭnyja źmieny.
Darečy, u svaim fejsbuku Michał Sikorski piša, što paśla prahladu jaho rolika mnohija palaki vykazvali žadańnie źjeździć na ekskursiju ŭ Biełaruś.
Kamientary