Łazavik: CVK nie budzie raźbiracca, na jakim aŭtamabili jeździŭ Łukašenka
U Centravybarkamie nie źbirajucca ŭdakładniać, pra jaki aŭtamabil Alaksandra Łukašenki kazała dyktarka BT.
Raspaviadajučy pra ŭdzieł Alaksandra Łukašenki ŭ adkryćci pieršaha ŭčastka druhoj kalcavoj aŭtadarohi, dyktarka BT skazała:
«Siońnia pačaŭ pracavać pieršy ŭčastak druhoj kalcavoj aŭtadarohi vakoł Miensku. U cyrymonii adkryćcia ŭziaŭ udzieł kiraŭnik dziaržavy i na spravie aprabavaŭ jakaść novaj darohi. Za rulom svajho ŭłasnaha aŭtamabila ździejśniŭ aznajamlenčuju pajezdku».
Jak staviacca da hetaha ŭ CVK? Bo ŭ deklaracyi kandydata ŭ prezydenty Łukašenki aŭtamabil nie paznačany. Sakratar CVK Mikałaj Łazavik tak prakamentavaŭ sytuacyju karespandentu Svabody:
— Ja hladzieŭ hety siužet. Pa-mojmu, tam nie było skazana, što za rulom svajho asabistaha aŭtamabila. Tam było skazana — sam, znachodziačysia za rulom aŭtamabila, zrabiŭ hetuju pajezdku.
— Heta jakraz było skazana dyktaram — «za rulom svajho ŭłasnaha aŭtamabila».
— A ŭ deklaracyi što, tam niama aŭtamabila?
— Nie.
— Nu, nie hatovy adkazać na hetaje pytańnie. Jość tam ci niama ŭ jaho asabistaha aŭtamabila. Mahčyma, dyktar pamyliŭsia. Pa-mojmu, u jaho tam ceły haraž jość aŭtamabilaŭ. Luby vybiraj, kožny dzień možna novy. Šejman padrychtuje, i kluč u zamok zapalvańnia ŭstavić.
— Ale kali kažuć pra ŭłasny aŭtamabil…
— Heta treba spytać u dyktara, adkul jon uziaŭ, što heta ŭłasny aŭtamabil.
— A vaša kamisija budziecie raźbiracca?
— A na jakoj padstavie my budziem raźbiracca? U nas niama takoha aficyjnaha dakumenta, jaki prymušaŭ by nas heta pierapraviarać.
Kamientary