U Biełarusi budujecca samaja biaśpiečnaja i sučasnaja AES u śviecie. Pra heta išła razmova na sustrečy Alaksandra Łukašenki z hienieralnym dyrektaram dziaržaŭnaj karparacyi pa atamnaj enierhii «Rasatam» Siarhiejem Kiryjenkam.
Alaksandr Łukašenka nahadaŭ, što rašeńnie ab budaŭnictvie AES u Biełarusi prymałasia ŭ niaprostaj situacyi, u biełarusaŭ jašče žyvaja pamiać ab trahiedyi na Čarnobylskaj AES. «I my damovilisia, što pabudujem samuju lepšuju stancyju. I budziem jaje budavać, jak prykład inšym, na vysokim uzroŭni», — skazaŭ biełaruski lidar.
«Śpiecyjalisty, jakich my pryciahnuli nie tolki ź Biełarusi, z usiaho śvietu, robiać adno zaklučeńnie, što nidzie tak nie budavałasia stancyja, jak u nas», — adznačyŭ jon.
Łukašenka padziakavaŭ Siarhieju Kiryjenku za čułyja adnosiny da Biełarusi i abaviazkovaść. «Dumaju, što biełarusy atrymajuć vydatnuju stancyju. I heta budzie navat niejki novy etap u budaŭnictvie atamnych stancyj i dla Rasijskaj Fiederacyi, jakaja źjaŭlajecca viadučaj krainaj pa mirnamu atamu», - padkreśliŭ kiraŭnik dziaržavy.
Alaksandr Łukašenka źviarnuŭ uvahu na toje, što pry budaŭnictvie atamnaj elektrastancyi zadziejničany nie tolki budaŭničyja arhanizacyi, ale i pramysłovyja pradpryjemstvy, što źjaŭlajecca dla ich dobraj dapamohaj u niaprostyja časy. Siarhiej Kiryjenka u svaju čarhu paćvierdziŭ, što Biełaruskaja AES budzie samaja biaśpiečnaja, u pieršuju čarhu, i samaja sučasnaja atamnaja stancyja pakaleńnia 3+. «Anałahaŭ hetaj stancyi niama pakul u śviecie, heta samaja sučasnaja, samaja biaśpiečnaja, - skazaŭ jon. - Absalutny pryjarytet addajecca biaśpieki, jakaści».
Siarhiej Kiryjenka adznačyŭ dobruju pracu biełaruskich padradnych arhanizacyj. «Heta ciažkaja praca, ale jany mocna nabrali kvalifikacyju, vopyt», - kanstatavaŭ jon. Pry hetym kiraŭnik «Rasatama» dadaŭ, što biełaruskija arhanizacyi, i budaŭničyja, i vyrablajuć abstalavańnie, buduć zapatrabavanyja ŭ dalejšym pry budaŭnictvie inšych atamnych elektrastancyj u śviecie, zamovy na jakija ŭžo majucca ŭ hetaj rasijskaj kampanii.
Kamientary