Za čatyry dni 4-hadovamu chłopčyku sabrali hrošy na lačeńnie i zamovili 6 tys. cacak

Andrejkavych śniehavikoŭ pakupniki hatovyja pačakać da 2030 hoda, «važna, kab jon ručku prykłaŭ da stvareńnia cacki». Čatyrochhadovy ŭkrainski chłopčyk z Čarkasaŭ prachodzić kurs chimijaterapii ŭ Respublikanskim navukova-praktyčnym centry radyjacyjnaj miedycyny i ekałohii čałavieka ŭ Homieli.

Pavialičyć

Razam z mamaj Andrej robić miłyja śviatočnyja cacki ź pienapłastu. I pradaje. Kab apłacić svajo lačeńnie. Litaralna za niekalki dzion na rachunak siamji Siamilit pastupiła 19 tysiač dołaraŭ, a Andreju — 6 tysiač zamovaŭ na navahodniaha śniehavička. Ciapier, kaža baćka chłopčyka Anton, zbor srodkaŭ spynieny:

«Nam litaralna za 4 dni nakidali ŭsiu patrebnuju sumu i zamovili 6 tysiač śniehavikoŭ. Tamu daj Boh, kab my ich za hod zrabili. Ludzi telefanujuć, mnohija prosta tak kidajuć hrošy i kažuć, što im nie patrebny śniehaviki. Niekatoryja abiacajuć, što da 2030 hoda pačakajuć, bo im važna, kab jon ručku prykłaŭ da stvareńnia śniehavika. Adhuknulisia ludzi ź Ispanii, Kanady, ZŠA, Francyi, Brytanii… Čatyry dni ŭ mianie telefon nie zmaŭkaŭ. Za apošnija sutki ja atrymaŭ 1700 SMS», — uzrušany mužčyna havoryć i płača.

Minułaj zimoj trochhadovy Andrej pieranios atyt. Paśla chvaroby la vuška źjavilisia dva limfavuzły. Chirurhi spasłalisia na zapalenčy praces, jaki voś-voś projdzie. Adnak u traŭni pravy bok tvaru chłopčyka pavialičyŭsia ŭ dva razy. Daktary spačatku stavili dyjahnaz limfadenit, ale pašyrany analiz kryvi pakazaŭ na vostry limfabłasny lejkoz. Pieršy błok chimijaterapii ŭ Čarkaskim ankałahičnym dyspansiery vynikaŭ nie daŭ.

«My adpravili dadzienyja analizaŭ u Nacyjanalnuju dziciačuju śpiecyjalizavanuju lakarniu. Ale viestki z Kijeva byli niesuciašalnyja, — uspaminaje tata Andreja. — Skazali, što prahres lačeńnia nie taki, jaki musić być, i našy šancy na vyzdaraŭleńnie mienšyja za 15-20 adsotkaŭ».

Pa paradzie znajomych padaŭlenyja navinoj baćki Andreja rašajucca na pajezdku ŭ Homielski radyjacyjny centr: litaralna za niekalki dzion jany robiać pašpart synu i afarmlajuć nieabchodnyja dakumienty. Ciapier stan chłopčyka stabilny.

«Dyjahnaz u Čarkasach nam pastavili 10 červienia. A ŭžo 8 lipienia my pryvieźli dzicia ŭ Homiel. Ź lipienia Andrej tam lečycca. Chvaroba ŭvajšła ŭ pieryjad remisii, i šancy na vylačeńnie vialikija», — raspaviadaje Anton Siamilit. Pa jaho słovach, lačeńnie ŭ Homieli praciahniecca jašče dva hady: da lutaha Andrej budzie znachodzicca ŭ stacyjanary, paśla jašče paŭtara hoda na padtrymlivajučaj chimii. Dla hetaha siamja ŭžo źniała kvateru ŭ horadzie: u joj žyvie babula Andrejki, jakaja ŭ vypadku nieabchodnaści ci prastudy padmianiaje mamu chłopčyka Alonu. Da taho ž, jana hatuje dla ŭnuka, jakomu treba dobra charčavacca, balničnuju ježu jon časam jeści admaŭlajecca.

Pavialičyć

Spačatku, pa padlikach siamji, pražyvańnie ŭ Homieli i lačeńnie Andreja štomiesiac abychodziłasia ŭ 2000 dołaraŭ. Ciapier, u suviazi z palapšeńniem zdaroŭja chłopčyka, suma skaraciłasia da 1700-1800 dołaraŭ. Paśla vypiski sa stacyjanara raschody siamji pavinny źnizicca da 500-700 dołaraŭ.

Sam Anton pracuje ŭ brata na firmie, jakaja zajmajecca pomnikami. Kaža, što 300 dołaraŭ, jakija jon zarablaje na asnoŭnaj pracy, heta dobry na ciapierašni čas zarobak va Ukrainie. Ale zrazumieła, što adnoj pracaj mužčyna nie abmiažoŭvajecca.

Siamja navat vystaviła na prodaž kvateru ŭ Čarkasach, kab było za što pieražyć nialohki pieryjad. Ciapier, kali pryjšła niečakanaja dapamoha «za śniehavikoŭ», kvateru vyrašyli pakinuć, kab było kudy viarnucca Andreju praz dva hady.

«Ciaham paŭhodździa źviartalisia da deputataŭ, u dabračynnyja fondy. Nam paŭsiul admaŭlali: maŭlaŭ, vy ž źjechali za miažu, vy ž nie zachacieli lačycca va Ukrainie. Ale my kažam: «Jak lačycca va Ukrainie, kali nam amal nie dajuć šancaŭ na vyzdaraŭleńnie?! — razvažaje Anton. Pa pryčynie «zamiežnaha» lačeńnia raźmiaščać rachunki siamji admaŭlalisia ŭkrainskija sajty i telekanały. Ale rezanans u internecie, vyklikany fota Andrejki sa śniehavičkami, robić svaju spravu: historyjaj chłopčyka zacikavilisia ŭkrainskija ŚMI, i siońnia siamja daje intervju telekanału «Intier».

7 śniežnia Andreju spaŭniajecca 4 hady. Jon nie viedaje, što znachodzicca ŭ balnicy: baćki kažuć, što ciapier jon u sanatoryi, dzie papraŭlaje zdaroŭje. Ź im pracujuć psichołahi. Ale chimijaterapija dziejničaje na chłopčyka pa-roznamu: časam jaho vanituje, psujecca nastroj.

«Jon nie razumieje, što ja vymušany pracavać tut, va Ukrainie. Admaŭlajecca časam sa mnoj razmaŭlać pa skajpie, kaža: «Tata mianie nie lubić, tata mianie kinuŭ», — skroź ślozy raspaviadaje Anton. — A ja nie mahu da jaho pryjechać, bo ja mušu zarablać hrošy».

Tym nie mienš, Andrej, jak i ŭsie chłopčyki, lubić mulciki pra tački dy «Samaloty\Letački» i mašynki. A jašče — rabić śniehavičkoŭ: zaviazvaje šaliki dy nabivaje pienapłastam tkaninu, jakuju prastročvaje mama.

Za lačeńnie Andreja ŭ Biełarusi treba zapłacić 34 tysiačy dołaraŭ: prykładna takaja ž suma, pa raźlikach baćki, spatrebiłasia b siamji dla lačeńnia va Ukrainie.

Ale biełaruskaja miedycyna vielmi prasunutaja ŭ lačeńni padobnych zachvorvańniaŭ, pierakanany Anton, i vielmi ŭdziačny biełaruskim daktaram, jakija robiać usio dla vyzdaraŭleńnia Andreja. Hrošy, jakija zastanucca paśla lačeńnia, siamja achviaruje ciažka chvoramu dziciaci z Čarkasaŭ. Anton dziakuje ŭsim ludziam, jakija adhuknulisia i dapamahli maleńkamu Andreju.

Darečy, 4 śniežnia ŭ Minsku projdzie majstar-kłas pa vytvorčaści śniehavičkoŭ. Takim čynam mamy i dzietki dapamohuć Andrejku vykanać šmatlikija zamovy sa ŭsiaho śvietu.

• 0
• 0
• 0
• 0
• 0
• 0
• 0
• 0