Ksienija Marhunskaja raspaviała, čamu ŭciakała z tralejbusa praz fortku VIDEA
Hučnaja historyja pra kanflikt u Minsku kantraloraŭ i pasažyrki zastajecca ŭ centry ŭvahi ŚMI. 32-hadovuju bieźbiletnuju pasažyrku kantralorka zabłakavała ŭ sałonie tralejbusa na kancavym prypynku i čakała milicyju. Adnak žančyna vylezła z sałona praz fortku, tolki torbačku ŭchapiła kantralorka. Usio heta zdymała na videa i kamientavała kiroŭca tralejbusa.
Za niekalki dzion videarolik nabraŭ na YouTube bolš za 400 tysiač prahladaŭ. Pra vypadak napisaŭ navat brytanski tabłoid Daily Mail.
Było viadoma, što ŭdzielniki kanfliktu napisali ŭ milicyi adno na adnaho sustrečnyja zajavy. Pravodzicca pravierka. Uviečary 11 śniežnia na telekanale STB źjaviŭsia siužet pra hetaje zdareńnie, u im byli nazvanyja imia i proźvišča pasažyrki: Ksienija Marhunskaja. Pra jaje skazali, što jana «amal daskanała viedaje anhlijskuju, ništavata razmaŭlaje na ispanskaj i vydatna havoryć na ruskaj». Adnak damovicca z kantralorami nie zmahła.
Vyśvietliłasia, što jana — instruktar pa fitnesu, vykładčyk i ŭ toj dzień spaźniałasia na pracu. A praz akno vyrašyła vyjści «z pryncypu».
«Ja prapanoŭvała pašpart, prapanoŭvała aficyjna aformić mnie štraf», — kaža Marhunskaja.
Dla składańnia pratakołu kantralory paprasili dziaŭčynu vyjści na vulicu. Ale razmovy nie atrymałasia i jany zajechali na kancavy prypynak.
«Kali ja stała prasoŭvacca da vychadu, kantralor stała mianie šturchać, u vyniku čaho ja ŭpała na siadzieńnie. Ja atrymała dva ŭdary ŭ plečavy sustaŭ. Kali ja sprabavała adkryć fortku, kantralor stała bić mianie pa rukach, nie dajučy mnie heta zrabić», — śćviardžaje pasažyrka ŭ intervju telekanału.
U kantralora STB kamientar nie zmoh uziać, pakolki ŭ jaje byŭ vychadny dzień. Načalnik kantrolna-revizijnaj słužby «Minsktransa» Juryj Davidovič adznačyŭ, što kantralorka sprabavała nie sumku pasažyrki zatrymać, a samu žančynu, «kab jana nie vyvaliłasia».
Pres-aficer Partyzanskaha RUUS Natalla Hanusievič paviedamiła, što materyjały pravierki znachodziacca va ŭčastkovaha milicyjaniera. Usim traim udzielnikam incydenta daduć aficyjny adkaz da 16 śniežnia.
Na videa STB hety siužet hł. ad 13.30.
Ciapier čytajuć
Piać pytańniaŭ, jakija zastajucca paśla śmierci eks-vykładčyka BNTU Ščukina, što ŭciakaŭ ad milicyi3
Kamientary