Płan pieramirja ŭ Siryi, uzhodnieny ZŠA i Rasijaj, pavinien nabyć moc apoŭnačy 27 lutaha, paviedamlaje telekanał «Al-Džazira» sa spasyłkaj na rabočy varyjant dakumienta, jaki akazaŭsia ŭ jaho rasparadžeńni.
Hetuju infarmacyju paćviardžaje i Rejter: pavodle dadzienych krynic ahienctva ŭ dypłamatyčnych kołach, pad dziejańnie damovy nie traplajuć ekstremisckija arhanizacyi «Isłamskaja dziaržava» i «Front an-Nusra».
Pra toje, što Złučanyja Štaty i Rasija damovilisia ab płanie spynieńnia ahniu ŭ Siryi, jaki pavinien pačać dziejničać u subotu, u hutarcy z Asašyejted pres paviedamili i amierykanskija vysokapastaŭlenyja čynoŭniki.
Pa ich słovach, abodva baki damovilisia ab terminach i ŭmovach «spynieńnia vajennych dziejańniaŭ».
Zhodna z umovami pieramirja, paviedamlaje «Al-Džazira», usie ŭdzielniki bajavych dziejańniaŭ u Siryi pavinny padpisać pahadnieńnie ab spynieńni ahniu da poŭdnia 26 lutaha.
Ahoń pavinien być spynieny da paŭnočy nastupnaha dnia. Miarkujecca, što pieramirje dazvolić naładzić pieramovy pamiž siryjskimi paŭstancami i ŭradam Bašara Asada.
Ahienctva Rejter cytuje zachodnich dypłamataŭ, jakija paviedamili, što spynieńnie ahniu nie budzie tyčycca hrupoŭki «Isłamskaja dziaržava» i źviazanaha z «Al-Kaidaj» «Frontu Al-Nusra».
Analityki, znajomyja ź situacyjaj u rehijonie, vykazvajuć skieptycyzm nakont efiektyŭnaści budučaha pieramirja, uličvajučy charaktar kanfliktu i toje, što papiaredniaja sproba abviaścić spynieńnie ahniu akazałasia biespaśpiachovaj.
Kamientary