Serca čałavieka, sprytnaść voŭka — recenzija na film «Kniha džunhlaŭ»
Žanr: multfilm, pryhody, drama, fentazi
Režysior: Džon Faŭro
U rolach (ahučka): Nił Sietchi, Bił Miurej, Bien Kinhśli, Idrys Elba, Łupita Nionha, Skarlet Jochansan, Džankarła Espazita.
ZŠA, 105 chv.
Adznaka: 8.
Niekali pantera Bahira znajšoŭ u džunhlach chłopčyka (Nił Sietchi). Zhraja vaŭkoŭ na čale z Akiełam biaruć u svaju siamju, maci jamu stanovicca vaŭčyca Rakša. Bahira vychoŭvaje jaho razam z vaŭkami. Adnojčy padčas zasuchi i pieramirja na vadapoj pryjšli ŭsie žyvioły, u tym liku i tyhr Šer-Chan. Jon abviaściŭ chłopčyka čužyncam i zahadaŭ vaŭkam addać jaho.
Paśla hetaha Maŭhli vyrašaje pakinuć zhraju, i Bahira ličyć najlepšym vyjściem advieści jaho ŭ viosku da ludziej. Na šlachu chłopčyka čakajuć adkryćci i zapaminalnyja sustrečy ź miadźviedziem Bału, pitonam Kaa i inšymi nasielnikami džunhlaŭ.
Čaćviortaja ekranizacyja adnajmiennaha tvora Kiplinha, jaki vyjšaŭ ŭ 1893, kinakampanijaj Walt Disney Pictures. Heta rymejk multfilma 1967-ha ŭ vyhladzie mastackaha filma, značnuju častku jakoha zajmaje kampjutarnaja animacyja. Aŭtary ŭnieśli ŭ siužet niekatoryja źmieny, uklučyŭšy bolš epizodaŭ z knihi Redjarda Kiplinha, kab zrabić apaviad bolš zajmalnym.
Usie miescy, dzie adbyvajecca dziejańnie filma, namalavanyja z dapamohaj kampjuternych technałohij. Nadzvyčaj realistyčna zroblenyja piersanažy žyvioł.
Pry ich stvareńni byli vykarystanyja zvyčki sapraŭdnych źviaroŭ, jakija akcioram daviałosia kapijavać pa technałohii zachopu ruchu.
Najlepšyja akciory ŭziali ŭdzieł u ahučcy viadomych piersanažaŭ «Knihi džunhlaŭ». Bału zahavaryŭ hołasam Biła Miureja, Bahira - Biena Kinhśli. Karala Łui ahučyŭ Krystafier Uokien, a Šer-Chana - Idrys Elba.

Upieršyniu ŭ historyi Kaa stała piersanažam žanočaha połu (jaje ahučvaje Skarlet Jochansan). U hetym filmie, jak i ŭ multfilmie 1967 hoda, Kaa admoŭny piersanaž.
Pry hetym Bahira u adpaviednaści z knihaj (i ŭ adroźnieńnie ad savieckaj ekranizacyi) — mužčynskaha połu.
U rymejku, jak i ŭ multfilmie, nie znajšłosia miesca knižnamu piersanažu Tabaki - šakału, prychvastniu Šer-Chana.
U dyśniejeŭskim multfilmie karol bander-łohaŭ Łui namalavany aranhutanam. U filmie jon źjaŭlajecca ŭ vyhladzie hihantapiteka. Ličycca, što hetyja prodki aranhutanaŭ nasialali niekatoryja častki Indyi.
Film pakidaje najlepšyja ŭražańni.
Stvaralniki maksimalna dakładna (nakolki heta mahčyma dla źviaroŭ, jakija razmaŭlajuć) pieradali płastyku žyvioł. Dziakujučy dramatyčnaści i emacyjnaści stužka budzie cikavaja nie tolki dzieciam, ale i darosłym.
Kamientary