Sudy nad aktyvistami: Palijenku aštrafavali na 4,2 miljona rubloŭ, spravu Kasinierava adpravili na dapracoŭku
26 krasavika ŭ Centralnym sudzie Miensku prajšli pracesy nad moładzievymi aktyvistami Źmitrom Palijenkam i Viačasłavam Kasinieravym.
Na Źmitra Palijenku byŭ składzieny pratakoł za ŭdzieł u niesankcyjanavanym pikiecie suprać abjadnańnia z Rasiejaj, jaki prajšoŭ 2 krasavika kala ambasady Rasiei.
Źmicier Palijenka na pikiecie byŭ u mascy, ale śviedki-milicyjanty zajavili sudu, što paznali aktyvista i identyfikavali jaho asobu pavodle admysłovaj bazy fatazdymkaŭ. Sudździa Michaił Choma aštrafavaŭ Źmitra Palijenku, jaki ŭ sud nie źjaviŭsia, na 20 bazavych vieličyń (4 200 000 biełaruskich rubloŭ).
Aktyvista Viačasłava Kasinierava sudzili za toje, što jon 8 krasavika kala budynku Śledčaha kamitetu na vulicy Sapioraŭ u Miensku vyviesiŭ baner «Ruki preč ad antyfašystaŭ».
Viačasłaŭ Kasinieraŭ byŭ zatrymany milicyjantam Uładzimiram Bochanam, jaki, pavodle jahonych słoŭ, «prosta prajaždžaŭ pobač». Pavodle śviedki heta było a 18.15 viečara. Ale ŭ pratakole, jaki skłaŭ supracoŭnik Centralnaha RUUS Dzianis Preśniak, paznačana, što pravaparušeńnie adbyvałasia a 18.50.
«Sud nia moža razhladać spravu, u jakoj nia vyśvietleny čas pravaparušeńnia, i musić adpravić materyjały spravy na dapracoŭku», — zaznačyła sudździa Viktoryja Šabunia.
Viačasłaŭ Kasinieraŭ nie chavaŭ u sudzie, što pravioŭ akcyju kala Śledčaha kamitetu z metaj salidarnaści sa svaimi siabrami-antyfašystami.
«Śledčy kamitet jaŭna pieraśleduje antyfašystaŭ Vałavika, Bojku i Cechanoviča pavodle palityčnych pryčyn. Ich užo druhi miesiac trymajuć na Vaładarcy, my sprabujem im dapamahać, čym možam. U Vadzima Bojki baćki invalidy, u Illi Vałavika za hety čas naradziŭsia syn. Sprava ich dvuchhadovaj daŭniny, tam straty byli na 280 tysiač, ich daŭno kampensavali, ale pryjšoŭ zahad pieraśledavać «levych», voś za ich i ŭzialisia», — raspavioŭ paśla sudu Viačasłaŭ Kasinieraŭ.
Sam Viačasłaŭ Kasinieraŭ viadomy jak «hraficist», jaki byŭ aštrafavany pavodle kryminalnaj spravy ab namalavańni lozunhaŭ «Biełaruś musić być biełaruskaj» i «Revalucyja śviadomaści, jana ŭžo idzie».
Kaleha pamierłaha vykładčyka Ščukina: Jaho kinuła žonka ź dziećmi, pačałasia depresija. U vyniku zvolnili za prahuły8
Kamientary