Śviedka zajaviŭ, što zabojca Mikałuckaha chacieŭ uzarvać Łukašenku i vyvučaŭ niuansy pieramiaščeńnia kartežu

Mała chto viedaje, što adnym z paciarpiełych pa spravie ab zabojstvie byŭ pryznany Alaksandr Łukašenka.

Pavialičyć

Na nastupny dzień paśla zabojstva Mikałuckaha, pryjechaŭšy ŭ Mahiloŭ, Łukašenka zajaviŭ: «Nichto z nas nie dumaŭ, što padstavaj dla siońniašniaj sustrečy stanie hniusnaje, svałačnoje zabojstva, — cytavała prezidenta hazieta «Respublika». — Złačyncy doŭha padbiralisia da prezidenta — nie atrymałasia. Vyrašyli pačać ź ludziej, jakija byli pobač ź im, jakija zaŭsiody vykonvali jaho volu. Ja razumieju, što heta vyklik. Jon kinuty. Tut, na mahiloŭskaj ziamli, chaču hetaj paskudzie abjavić, što prymaju jaje vyklik».

Krychu paźniej u adnym sa svaich publičnych vystupaŭ Łukašenka zaŭvažyŭ: «Paralelna sa spravaj, źviazanaj z zabojstvam Jaŭhiena Mikałuckaha, raspačata kala 60 kryminalnych spraŭ. Napeŭna, rana kazać, ale žyćcio prezidenta visieła na vałasku…»

Na dumku pravaachoŭnych orhanaŭ, «banda Tkačova» nie tolki ździejśniła terarystyčny akt u dačynieńni da Jaŭhiena Mikałuckaha, ale i rychtavała zamach na Alaksandra Łukašenku. Pryčym vielmi hruntoŭna…

Prezident pad prycełam

Navošta Valeryju Tkačovu i jaho kampańjonam spatrebiłasia zabojstva prezidenta? U śledstva było niekalki viersij.

Pa-pieršaje, Tkačoŭ byŭ zaciatym praciŭnikam Łukašenki i byŭ vielmi niezadavoleny aktyvizacyjaj baraćby z karupcyjaj i arhanizavanaj złačynnaściu: maŭlaŭ, usio heta pieraškadžała jaho złačynnym zadumam.

Pa-druhoje, Tkačoŭ chacieŭ destabilizavać hramadski paradak.

Pa-treciaje, u jaho mahli być karyślivyja intaresy — jak viadoma, za zakaznyja zabojstvy zvyčajna dobra płaciać.

Kamuści hetyja viersii padaducca niesurjoznymi, tym nie mienš mienavita ich adpracoŭvała śledstva.

U Minsku Valeryj Tkačoŭ na praciahły termin źniaŭ kvateru. Na vulicy Radužnaj, niedaloka ad prezidenckaj rezidencyi ŭ Drazdach. Kvatera znachodziłasia na vysokim paviersie, vokny vychodzili na praśpiekt — heta davała mahčymaść biez prablem vyvučyć niuansy pieramiaščeńnia prezidenckaha kartežu.

Pakolki Tkačoŭ mieŭ admysłovuju aparaturu dla prasłuški, jon moh kantralavać efir, u jakim viali pieramovy słužby achovy i supravadžeńnia prezidenta. Śledčyja ličyli, što paru miesiacaŭ Tkačoŭ razam sa svaim tavaryšam Viktaram Jančeŭskim nie tolki pilna nazirali za žyćciom vakoł rezidencyi, ale i šukali miesca, kudy zakłaści vybuchovaje prystasavańnie.

Pra ŭsio heta na dopytach kazaŭ hałoŭny śviedka abvinavačvańnia — 22-hadovy Anatol Haŭryłaŭ. Pakolki jon u svaich pakazańniach nazvaŭ navat sakretnyja radyjočastoty, na jakich pierahavorvalisia śpiecsłužby i prezidenckija achoŭniki, vialikamu sumnievu jaho pakazańni padviarhać nie stali.

Sa słoŭ abvinavačanych, Haŭryłaŭ raspavioŭ, što vybuchoŭku mieli namier zakłaści ŭ adnoj z drenažnych trub niepadalok ad rezidencyi ŭ Drazdach. Pa śpiecyjalnym padručniku pa padryŭnych rabotach, jaki paśla kanfiskavali ŭ zachoplenaha zbrojevaj tematykaj Ramana Radzikoŭskaha, Haŭryłaŭ pa prośbie Tkačova navat padličyŭ, kolki vybuchovaha rečyva spatrebicca dla taho, kab aŭto, u jakim jedzie prezident, uźlacieła na pavietra. Havorka išła pra dziasiatki kiłahramaŭ.

Nahadajem, što ŭ haražach, jakija naležali Valeryju Tkačovu, znajšli niamała zbroi, u tym liku i skryni z novieńkim traciłam, a taksama pryłady, pry dapamozie jakich možna było dystancyjna ažyćciavić vybuch.

Datu, na jakuju byŭ zapłanavany zamach na Alaksandra Łukašenku, śledčym vyśvietlić nie ŭdałosia. Valeryj Tkačoŭ pamior, a Viktar Jančeŭski kateharyčna admaŭlaŭ svajo dačynieńnie da hetaj dziŭnaj historyi.

Na dumku śledstva, jakoje hruntavałasia na pakazańniach Haŭryłava, Viktar Jančeŭski praktyčna nie načavaŭ u kvatery, jakuju ŭ Minsku źniaŭ Tkačoŭ. Kožny viečar Viktar kudyści sychodziŭ i viartaŭsia tolki ranicaj. Źmiorzły, jon adrazu išoŭ hrecca ŭ haračuju vannu. Haŭryłaŭ ličyŭ, što Jančeŭski načami naziraŭ za žyćciom vakoł prezidenckaj rezidencyi.

Cikavy fakt: pry dapamozie admysłovych skanaraŭ radyjoefiru Valeryj Tkačoŭ prasłuchoŭvaŭ pieramovy słužby achovy prezidenta. Jon moh vyznačyć, dzie mienavita jedzie mašyna z karteža, u jakoj znachodzicca prezident. Schiema pieramiaščeńnia karteža była jamu absalutna viadomaja. Cikavili tolki detali, ad jakich šmat u čym zaležaŭ pośpiech abo pravał zadumanaha. Tamu Tkačoŭ ledź nie kožny dzień ź binoklem u rukach prastojvaŭ kala akna: naziraŭ, zapisvaŭ, paraŭnoŭvaŭ…

Kartež składaŭsia z čatyroch-piaci aŭto. Spačatku jechała sihnalnaja milicejskaja mašyna z probliskavymi majačkami. Za joj — inšaje aŭto, jakoje spyniałasia na skryžavańni vulicy Radužnaj i ciapierašniaha praśpiekta Pieramožcaŭ. Niezadoŭha da prajezdu karteža pa praśpiekcie i darozie, jakaja idzie ad prezidenckaj rezidencyi, pavolna prajazdžała jašče adna mašyna z taniravanym škłom… Padobnyja niuansy — u kolki vyjechali, dzie spynilisia, u jakoj paśladoŭnaści paviarnuli — Tkačova cikavili asabliva.

Chutkaść ruchu karteža Tkačoŭ vyznačyŭ na voka — kala 80 kiłamietraŭ na hadzinu. Zychodziačy z hetaha viali raźliki času spracoŭvańnia dystancyjnaha kiravańnia bombaj i nieabchodnaj mahutnaści zarada vybuchoŭki. Pult kiravańnia vybuchnoj pryładaj zrabili na asnovie birulki z aŭtamabilnaj sihnalizacyi.

Rasśledavańnie viadzie KDB

Anatol Haŭryłaŭ nie vyklučaŭ, što Valeryj Tkačoŭ za ŭdały zamach na kiraŭnika dziaržavy pavinien byŭ atrymać materyjalnaje ŭznaharodžańnie. Praŭda, śledčaj hrupie, jakaja rasśledavała spravu ab zabojstvie Mikałuckaha, tak i nie ŭdałosia vyśvietlić, pa čyjoj zamovie Tkačoŭ rychtavaŭ zamach na Łukašenku. Tamu ŭ dačynieńni da niavyjaŭlenych asob, jakija źjaŭlalisia zamoŭcami i arhanizatarami zamachu na prezidenta, była zaviedzienaja kryminalnaja sprava, vyłučanaja sa spravy Jaŭhiena Mikałuckaha ŭ asobnuju vytvorčaść. Paviedamlałasia, što rasśledavańniem zajmaŭsia Kamitet dziaržaŭnaj biaśpieki.

Paśla abviaščeńnia prysudu abvinavačanym u zabojstvie Jaŭhiena Mikałuckaha i zamachu na prezidenta, dziaržaŭny abvinavaŭca, starejšy prakuror adździeła kryminalnaha i sudovaha nahladu prakuratury Biełarusi Viktar Žynhiel, skazaŭ žurnalistam: «Kamitet dziaržbiaśpieki praciahvaje rasśledavańnie pa vyjaŭleńni zamoŭcaŭ hetych złačynstvaŭ. Tak što ŭsie kropki nad «i» jašče nie rasstaŭlenyja. Budziem zajmacca, budziem rasśledavać, budziem šukać».

Prypyniena rasśledavańnie hetaj spravy siońnia ci jaho prosta śpisali ŭ archiŭ za daŭnaściu hadoŭ — dakładna nie viadoma. Aficyjna pra heta nidzie nie paviedamlałasia.

• 0
• 0
• 0
• 0
• 0
• 0
• 0
• 0