Fiadynič: Julija Juchnaviec atrymała pratakoł za abjavu pra intym-masaž, dyk my dapamahli sa štrafam
Padčas pieršaha sudovaha pasiadžeńnia pa «spravie prafsajuzaŭ» śviedka Julija Juchnaviec pryznałasia, što supracoŭničała z KDB, kali pracavała ŭ REP sakratarkaj.
U svaich pakazańniach 22-hadovaja dziaŭčyna adznačyła: jana nieadnarazova jeździła ŭ Vilniu, dzie Fiadyniču i Komliku nibyta pieradavali hrošy dla pravozu praź miažu ŭ Biełaruś. Pavodle jaje słoŭ, adnojčy jana pieraličyła sumu ŭ kanviercie i sfatahrafavała kupiury. Na pytańnie prakurora navošta, Juchnaviec skazała, što zrabiła heta «z asabistaj cikaŭnaści», ale potym dadała, što supracoŭničała z Kamitetam dziaržbiaśpieki ŭ jakaści ahienta z 2015 hoda. Akramia taho, Juchnaviec atrymlivała ad KDB uznaharodžańnie.
Takoje pryznańnie byłoj sakratarki prysutnyja ŭ sudovaj zali sustreli vokličam «Hańba!». Paśla jana syšła i admoviłasia ad kamientaroŭ žurnalistam. Paźniej belsat.eu pasprabavaŭ źviazacca ź Julijaj praz sacyjalnyja sietki, ale i tam jana kateharyčna admoviłasia ad intervju. Na nastupny dzień, 31 lipienia, Juchnaviec źjaviłasia ŭ sudzie da pačatku pasiadžeńnia. Pabačyŭšy intares presy da siabie, dziaŭčyna chutka źbiehła.
«Mahčyma, jana prychodziła ŭ druhi raz, kab źmianić pakazańni abo niešta dadać…» — miarkuje Hienadź Fiadynič.
U razmovie z belsat.eu prafsajuzny lidar adznačyŭ, što i raniej zdahadaŭsia pra supracu Juchnaviec z KDB.
«Padazreńnie ŭźnikła ŭ mianie 2 žniŭnia minułaha hodu (paśla vobšuku ŭ ofisie REP, — red.). Tam u mianie była chovanka, kudy ja kłaŭ usio zapar: niejkija dyski, prosta infarmacyju. Raniej ja kazaŭ sakratarcy: pra heta viedaju tolki ja i jana. Ale hetuju chovanku ŭskryli pieršaj pry pieratrusie, adrazu, jak pryjšli. Ničoha asablivaha tam nie było, ale ja vymušany byŭ rabić takija pravierki ludziam», — skazaŭ Fiadynič.
Pavodle słoŭ prafsajuznaha lidara, Mienski dziaržaŭny kaledž elektroniki byŭ na prafuliku REP. Kali jon pačaŭ šukać sakratara, to jamu ŭ kaledžy paraili Juchnaviec jak spakojnuju pracavituju dziaŭčynu. U 2014 hodzie joj było 18.
Na dumku Fiadyniča, Juchnaviec zavierbavali prykładna praz hod paśla pracaŭładkavańnia ŭ prafsajuz.
«Jana roznymi spravami zajmałasia raniej… Skončyła niejkija kursy masažu, lubiła chadzić tančyć u načnych kłubach la šastoŭ. Kali Jula ad nas užo syšła, adzin raz pryjechała i paskardziłasia, što jaje zatrymlivali i dali štraf pa administratyŭnaj spravie. Jak vyśvietliłasia, jana ź siabroŭkaj vykłała ŭ internecie abjavu, padajecca, pra intym-masaž. Nu pravaachoŭniki pa ich i pryjechali, skłali pratakoł, asudzili. Ja sam bačyŭ hetuju pastanovu. Ščyra skažu, my joj pa-čałaviečy dapamahli sa štrafam, bo jana vielmi nie chacieła, kab baćki daviedalisia», — uzhadvaje Fiadynič.
Na sudzie Fiadynič zapytaŭsia ŭ Juchnaviec, ci nie źviazanaja historyja sa štrafam ź vierbavańniem KDB — taja adkazała admoŭna.
Ciapier usie profili Juchnaviec u sacsietkach vydalenyja, pa mabilnym telefonie jana taksama nie adkazvaje.
***
Sud pa «spravie prafsajuzaŭ» raspačaŭsia 30 lipienia. Hienadzia Fiadyniča i Ihara Komlika vinavaciać va «ŭchileńni ad vypłaty padatkaŭ u asabliva bujnym pamiery» (č. 2 art. 243 Kryminalnaha kodeksu Biełarusi). Maksimalnaje pakarańnie pavodle hetaha artykułu — da 7 hadoŭ pazbaŭleńnia voli. Śledčyja abvinavačvajuć prafsajuznych dziejačaŭ u tym, što jany mieli rachunak u Litvie i ad nierezidentaŭ Biełarusi na jaho pastupali hrošy. Pavodle raźliku KDK, suma niavypłačanych padatkaŭ skłała 22.867,1 rubla.
«Vašyja ručki papiery pierakładajuć, a ja svaimi ŭsio žyćcio ŭ ziamli pracuju!» — u sudzie dapytali 81-hadovuju ciešču Fiadyniča
Praces Fiadyniča i Komlika: užo druhi śviedka abvinavačańnia admoviŭsia ad pakazańniaŭ, spasłaŭšysia na cisk padčas śledstva
Sakratarka prafsajuza REP pryznałasia, što była ahientam KDB
Pačaŭsia praces Fiadyniča i Komlika: im pahražaje turma za zbor hrošaj za miažoj na patreby prafsajuza
Ciapier čytajuć
Kvadrat u Minsku kaštuje rekordna doraha: narešcie pabity rekord 2007 hoda2
Kamientary