U Biełarusi źjaviłasia čaćviortaja žančyna na čale rajvykankama. Alena Aleksina — chto jana?
Alaksandr Łukašenka ŭzhadniŭ novych kiraŭnikoŭ rajvykankamaŭ i pradpryjemstvaŭ. Adnym z novych naznačencaŭ stała Alena Aleksina, jakaja stała staršynioj Homielskaha rajvykankama. Raniej jana ŭznačalvała Buda-Kašaloŭski rajonny saviet deputataŭ.
Ad viasny i da hetaha času hałoŭnaje miesca vykanaŭčaj ułady ŭ rajonie pustavała: z aficyjnaha sajta rajvykankama źnikła infarmacyja pra Alaksandra Sitnicu, jaki i byŭ apošnim staršynioj z 2009 hoda. Paźniej stała viadoma, što jaho zatrymali i adpravili ŭ SIZA za chabary.
Apošnim časam Alena Aleksina była staršynioj Buda-Kašaloŭskaha rajsavieta deputataŭ.
Pachodzić jana z hetaha ž rajona: naradziłasia 16 maja 1966 hoda ŭ pasiołku Biarezina. Baćkoŭ žančyny ŭžo niama ŭ žyvych. Vučyłasia spačatku ŭ Bušaŭskaj siaredniaj škole (heta za 3-4 kiłamietry ad jaje rodnaha pasiołka), paśla — na inžyniera-budaŭnika ŭ Biełaruskim instytucie inžynieraŭ čyhunačnaha transpartu, ale pracavać pajšła pa profili svajoj druhoj adukacyi — Alena maje dypłom mieniedžara sacyjalnaj śfiery, vydadzieny ŭ Akademii kiravańnia.
Aleksina — heta jaje proźvišča pa mužu, ad naradžeńnia ž jana była Tkačovaj. Alena Ivanaŭna maje darosłuju dačku Volhu, jakaja pracuje viasielnym fatohrafam.
Žančyna 29 hadoŭ adpracavała ŭ Buda-Kašaloŭskim rajonie: spačatku śpiecyjalistkaj upraŭleńnia pa pracy i zaniataści, potym — jaho načalnicaj, paśla padałasia ŭ miascovyja deputaty. Stanaviłasia deputatkaj Buda-Kašaloŭskaha rajsavieta apošnija try sklikańni.
Kalehi adklikajucca pra jaje jak «kiraŭnicu ź vialikaj litary i čałavieka słova, jaki davodzić lubuju spravu da kanca». Sama ž novaja kiraŭnica rajona admaŭlajecca ad kamientaroŭ, ścipła kažučy, što «rada navinie».
Cikava, što Aleksina stanie čaćviortaj u Biełarusi žančynaj ź liku tych, što ŭznačalvajuć rajvykankamy. Akramia jaje, takija pasady zajmajuć Volha Mocharava (Dobrušski rajon), Alena Paŭlečka (Mazyrski rajon) i Vieranika Bajkova (Łojeŭski rajon). Cikava, što ŭsie jany pracujuć na Homielščynie.
U internet źlili pierapisku Kavaleŭskaha i Cichanoŭskaj. Ale kancoŭ nie znajści31
Kamientary